Ilmiy izlanishlar qilish, o‘z sohasi bo‘yicha tadqiqotlar olib borish va natijada ushbu olgan ilmini oliy ta'limda amaliyotga joriy etish magistratura bosqichining asosiy maqsadi va vazifasidir. Magistratura ilmiy-tadqiqot va ilmiy-pedagogik faoliyat olib borish uchun mo‘ljallangan ta'lim turi ekanini hisobga oladigan bo`lsak, oliy ta’lim tizimida sifatli kadrlarni tanlash masalasi mohiyati teranroq anglashadi. Bugun Buxoro davlat universiteti rektori Obdjon Xamidov boshchiligidagi 2-bosqich magistrantlar bilan bo`lib o`tgan “Rektor uchrashuvi”da aynan shu masalaga e’tibor qaratildi.
Uchrashuvni Buxoro davlat universiteti O'quv ishlari prorektor v.v.b Rustam Jumayev ochib berdi. Uchrashuvda ishtirok etayotgan magistrantlarga ta’lim muassasasida olib borilayotgan o`quv metodik ishlar, bitiruvchilarning ilmiy faoliyatining borishi, 2020/2021-o`quv yili bitiruvchilarining ish bilan ta’minlanganligi, joriy o`quv yilida yangi ochilgan mutaxassisliklar, Xalqaro IELTS sertikatining ahamiyati, me’yoriy hujjatlar bilan ishlash ko`nikmasini shakllantirish, Buxoro davlat universitetiga ishga joylashishdagi talablar, jamoatchilik kengashi nazorati xususida atroflicha ma’lumotlar berildi.
Shundan so`ng, BuxDU rektori Obidjon Xamidov qatnashuvchilar bilan ochiq muloqot tarzida suhbat olib bordi. “Biz siz bilan ushbu bosqichga qadam qo`ygan kuningizdan beri ancha masalalarda muloqot qildik, kerakli tavsiyalar berdik. O‘zbekiston Respublikasi Oliy ta’lim tizimini 2030-yilgacha rivojlantirish konsepsiyasi qabul qilingan. Konsepsiyada nazarda tutilgan barcha ta’lim jarayonlari raqamlashtirish tizimiga o`tkazish, oliy ta’lim muassasalarining akademik mustaqilligini ta’minlash, oliy ta’lim mazmunini sifat jihatidan yangi bosqichga ko‘tarish, ijtimoiy soha va iqtisodiyot tarmoqlarining barqaror rivojlanishiga munosib hissa qo‘shadigan, mehnat bozorida o‘z o‘rnini topa oladigan yuqori malakali kadrlar tayyorlash tizimini yo‘lga qo‘yish va ularni oliy ta’lim tizimida qoldirish masalalarida tizimli ishlar amalga oshirilmoqda. Ushbu uchrashuv mana shu ezgu maqsad yo`lida sizga kerakli tavsiyalarni bera olishiga shubham yo`q.”
Uchrashuvda xalqaro sertifikatga ega, o`z loyihalari ustida ishlayotgan, hamkasblariga nisbatan ko`proq natijalarga erishgan magistrlarning fikrlari tinglandi. Shijoati bor, biznes loyihalariga ega magistrlarning faoliyati hamda tajribasi bilan o`rtoqlashildi. Universitetning kelgusidagi yangi, istiqbolli rejalari xususida ma’lumotlar berildi. Mehnat bozorida raqaboatbardoshlikni oshirish uchun muhim tavsiyalarga alohida urg`u berildi. Har qanday g`oya, innovatsiya, qobiliyat ijobiy baholanishi va Buxoro davlat universiteti tomonidan moddiy hamda ma’naviy qo`llab-quvvatlanishi ta’kidlandi.
Buxoro davlat universiteti Magistratura bo`limi boshlig`i Akmal To`rayev so`zga chiqib, magistrantlar ilmiy faoliyatining borishi, ilmiy maqolalar chop etish bilan bog`liq ishlar, davomat, dissertatsiya ishi bilan bog`liq masalalarga alohida to`xtaldi.
Uchrashuv har galgidan sermazmun o`tdi. Bitiruvchilar o`zlarini qiziqtirgan barcha masalalarga javob oldilar.
