9-fevral – "Shams ul-millat" — millat quyoshi tavallud topgan kun! Turkiy adabiyot osmonining munavvari Alisher Navoiy tavalludiga 581 yil to‘ldi.
Bugun erta tongda Buxoro davlat universitetida Hazrat Navoiyga o‘rnatilgan byust qarshisida Buxoro Yozuvchilar uyushmasi raisi, shoir Shodmon Sulaymon, O`zbekiston Respublikasi Ma'naviyat-ma`rifat markazi Buxoro viloyati bo`limi rahbari Marhabo Pardayeva, jamoatchilik vakillari, BuxDU rektori Obidjon Xamidov boshchiligidagi universitet rahbariyati, professor-o`qituvchilar, talaba-yoshlar to`planishdi. Hazrat Navoiyga ehtirom yuzasidan byust poyiga gulchambar qo‘yilib, hurmat bajo keltirildi.
– Butun umrini turkiy tilning nufuzini ko`tarish, turkiy davlatchilik asoslarini mustahkamlash, mushtarak tushunchalar - mehr-oqibat, do`stlik, insoniylik, vatanparvarlikni tarannum etish hamda haqiqat va adolatni qaror toptirishga bag`ishlagan hazrat Navoiy bizning hurmatimiz, e'tirofimiz, e'zozimizga hamisha munosib. Alisher Navoiy orzusidagidek jamiyat barpo etish, hazratdek komil ustoz, mukarram inson bo`lish har birimizning avlodlik burchimiz, desam aslo mubolag`a bo`lmaydi, – dedi BuxDU rektori Obidjon Xamidov Alisher Navoiy tavalludi bilan barchani tabriklash asnosida.
– Hazrat Navoiy benazir shaxs, ulug` ijodkor. Biz bunday ajdodlarga nisbatan hech qachon “rahmatli” deb eslamaymiz, boisi ular hamisha, hammavaqt mangulikka daxldor, biz bilan bir zamonda yashayotgandek… Hazrat Navoiy siymosi, nomi, ijodi har bir yosh qalbida, har bir ustoz ko`nglida yashaydi. Bu kun har bir o`zbek xonadonida bayram. Ushbu sana bilan barchangizni muborakbod etaman, – deya samimiy dil so`zlarini bildirdi Buxoro Yozuvchilar uyushmasi raisi, shoir Shodmon Sulaymon.
Darhaqiqat, Alisher Navoiy dahosiga ehtirom – bu Vatanga bo`lgan ehtiromning namunasidir. Taniqli olim Najmiddin Komilov yozganidek: ”Navoiy ma’naviyatimiz ummoni. Undan qancha qonib ichsak, shuncha yuksalamiz.”
Erta tongdan bayramona kayfiyatda boshlangan kun turli-tuman tadbirlarga ulanib ketdi.Buxoro davlat universiteti bosh faollar yig`ingohida Buyuk shoir va mutafakkir Hazrat Alisher Navoiy tavalludining 581 yilligi munosabati bilan "Fasohat mulkining sohibqironi“ shiori ostida o`tkazilgan ma'naviy-ma'rifiy tadbir barcha adabiyot ixlosmandlarini bir nuqtaga jamladi.
Har yili Filologiya fakulteti professor-o`qituvchilari va talabalari tomonidan an'anaviy tarzda o`tkaziladigan ushbu adabiyot bayrami O'zbek tili va adabiyoti kafedrasi dotsenti Bekova Nazzora Jo'rayevna hamda Zarina Sayliyeva tomonidan tashkillashtirildi. Tadbirni Buxoro davlat universiteti rektori Obidjon Xamidov barchani ushbu qutlug` sana bilan tabriklab ochib berdi:
– Tarixda shunday tub burilish nuqtalari bo‘ladiki, u muayyan bir millat yoki xalq uchun uyg‘onish davrini boshlab beradi. Hazrat Navoiy ana shunday shaxs sifatida tariximiz, bugunimiz va ertamizda ham millatimizning faxr-u iftixoridir. Mana 600 yildirki Alisher Navoiy tilimizning bayroqdori, she’riyat mulkining sutoni, madaniyat va ma’rifatimizning porloq quyoshi bo‘lib kelmoqda. Ba’zan o‘ylab, hayratda qolasan kishi, odam bolasi ham shunchalik salohiyatga ega bo‘lishi mumkinmi? Atigi 60 yillik umrida, tag‘in par-u siyohdon bilan ishlangan o‘rta asrlarda, bugungi kitobatchiligimiz o‘lchovi bilan 20 tomlik asarlar yoza olganligi, buning ustiga notinch zamonda, yana davlat ishlari bilan ham mashg‘ulligi, haqiqatda ham Alisher Navoiyning Alloh ato etgan benazir bir quvvatga ega daho bo‘lganligini ko‘rsatadi.
Shundan so`ng, Filologiya fanlari doktori Shavkat Hayitov “Alisher Navoiy so‘zlari mag‘zidagi bir talmehning yuzdan bir sharhi” ma’ruzasi yig`ilganlar e'tiboriga havola etildi.Tadbirning badiiy qismida O'zbek filologiyasi fakulteti talabalari tomonidan hazrat Navoiyning dostonlaridan sahna ko'rinishlari namoyish etildi. Mahorat bilan ijro etilgan kuy-qo'shiqlar va raqslar barchaga a'lo kayfiyat bag'ishladi.
