Kuni kecha Oliy va o‘rta maxsus ta’lim vazirining fan va innovatsiyalar bo‘yicha o‘rinbosari Rahimjon Hakimovning oliy ta’lim muassasalarida talabalarga sifatli ta’lim berish uchun yaratilgan shart-sharoitlar bilan tanishish maqsadida Buxoro viloyatiga xizmat safarining uchinchi kunida Buxoro viloyatining Oliy ta'limdan keyingi ta'lim institutida tahsil olayotgan doktorant (DSc) va tayanch doktorantlar ( PhD) uchrashuvi bo`lib o`tdi. Buxoro davlat universiteti bosh faollar yig`ingohida bo`lib o`tgan uchrashuvda viloyatdagi barcha doktorant (DSc) hamda tayanch doktorantlar (PhD) ishtirok etishdi.
Uchrashuvda so`zga chiqqan O`zbekiston Respublikasi Oliy va o`rta maxsus ta'lim vazirining fan va innovatsiyalar bo`yicha o`rinbosari Rahimjon Xakimov, Nizomiy nomidagi Toshkent davlat Pedagogika universiteti rektori Abdug'affor Qirg'izboyev hamda Buxoro davlat universiteti rektori Obidjon Xamidovlar doktorantlarga ilmiy-ijodiy izlanish yo`lida o`z tavsiyalarini berib o`tishdi.
– Bugungi kunda Yevropaning taraqqiy topa borishida ilm-fanga bo`lgan e'tiborining yuksakligi, har bir ishda layoqat bilan yondashishi, vijdonan mehnat qilishi sabab bo`lyapti, desam aslo mubolag`a bo`lmaydi. Bugungi kun talabasi ilg`or, ikki-uch tilda bemalol gaplasha oladi. Agar siz har bir ma'ruzangizni yuzlab kitobni o`zlashtirib tayyorlamas ekansiz, Oliy ta'limda faoliyat yurita olmaysiz. Bu qutlug` dargoh kelajagimiz poydevorlarini rivojlantirishi kerak. Modomiki ilm-fan kishisi ekanmiz, jamiyatning ongini, dunyoqarashini isloh qilishda, ilm yo`lida birlashadigan avlodni jamiyatga yetkazishda ilg`or bo`laylik, – dedi Oliy va o‘rta maxsus ta’lim vazirining fan va innovatsiyalar bo‘yicha o‘rinbosari Rahimjon Hakimov doktorantlarga yuzlanib.
– Hozirgi kunda yosh olimlar faoliyati har tomonlama qo’llab-quvvatlanyapti va bu shart-sharoit va qulayliklardan siz ham foydalanyapsiz. Maqsadimiz faqat va faqat yaratish, xalq koriga yaraydigan innovatsiyalar ustida ishlash, jahon tan oladigan, jamiyatga foydali loyihalar ustida ishlashdan iborat bo`lishi kerak, – dedi universitet rektori Obidjon Xamidov o`z qarashlarini o`rtoqlashish asnosida.
Uchrashuvda kamchiliklar aytildi, takliflar, g`oyalar berildi. Uchrashuv ishtirokchilari o`zlarini qiziqtirgan barcha savollarga javob olishdi.
