2015 yil 9 sentyabr kuni Oliy va o`rta maxsus ta’lim vazirining “Oliy ta’lim muassasasi professor-o`qituvchilar tarkibining o`quv, ilmiy-metodik, ilmiy-tadqiqot, tashkiliy-metodik, ma’naviy-axloqiy va tarbiyaviy ishlar yuklamasini aniqlash qoidalarini tasdiqlash to`g’risida”gi buyrug’i imzolangan edi.Unga ko`ra, Oliy ta’lim muassasasi professor-o`qituvchilar tarkibining o`quv, ilmiy-metodik, ilmiy-tadqiqot, tashkiliy-metodik, ma’naviy-axloqiy va tarbiyaviy ishlar yuklamasini aniqlash qoidalari va vaqt me’yorlari tasdiqlandi. Bu haqda huquqshunos Xushnudbek Xudoyberdiev o`zining blogida batafsil ma’lumot berdi.Ushbu hujjatning amal qilishi oliy harbiy ta’lim muassasalari hamda O`zbekiston Respublikasi hududida o`z faoliyatini yuritayotgan xalqaro va xorijiy oliy ta’lim muassasalariga nisbatan tatbiq etilmaydi.Professor-o`qituvchilar tarkibi mehnatini normalashtirish har yili kelgusi o`quv yili uchun tuziladigan va belgilangan tartibda tasdiqlanadigan shaxsiy ish rejalariga asoslanadi. Yillik shaxsiy ish reja 1540 soat miqdoridagi ish vaqtining jamlangan hisobidan kelib chiqadi. Qoidalarga ko`ra, ish turlari bo`yicha hisoblangan soatlar hajmi oliy ta’lim muassasasining shtat birliklari sonini hamda professor-o`qituvchilar tarkibining oylik maoshlarini belgilash uchun asos bo`lmaydi.Kafedra professor-o`qituvchilari o`rtasida ishlarni normalashtirish bo`yicha tavsiya etiladigan taqsimot: o`quv ishlari — 50% — 70%; ilmiy-metodik ishlari — 5% — 10%; ilmiy-tadqiqot ishlari — 15% — 20%; tashkiliy-metodik ishlar — 5% — 10%; ma’naviy-axloqiy va tarbiyaviy ishlar — 10% — 15%. Ma’ruza mashg’ulotlari professor, dosent, katta o`qituvchi va ilmiy darajaga ega bo`lgan assistent (o`qituvchi)lar tomonidan o`tkaziladi. Zarur hollarda (ma’ruza mashg’ulotlari hajmi ko`p bo`lganda, professor, dosent va katta o`qituvchilar etarli bo`lmaganda va shu kabi boshqa hollarda) kamida 3 yillik ilmiy-pedagogik (ilmiy) ish stajiga ega assistent yoki o`qituvchilarga bir o`quv yilida 100 soatgacha bo`lgan hajmda ma’ruza mashg’ulotlarini o`tishga oliy ta’lim muassasasi kengashining qaroriga asosan ruxsat beriladi.Toshkent davlat yuridik universitetida assistent yoki o`qituvchilarga, ularning ilmiy-pedagogik (ilmiy) ish staji muddatidan qat’i nazar, bir o`quv yilida 250 soatgacha bo`lgan hajmda ma’ruza mashg’ulotlarini o`tishga mazkur ta’lim muassasasi kengashining qaroriga asosan ruxsat beriladi. Professor-o`qituvchilarning o`quv (ma’ruza, amaliy, seminar va laboratoriya) soatlari hajmi 400 soatdan kam bo`lmasligi tavsiya etiladi. Oliy ta’lim muassasasi professor-o`qituvchilar tarkibining o`quv, ilmiy-metodik, ilmiy-tadqiqot, tashkiliy-metodik, ma’naviy-axloqiy va tarbiyaviy ishlar hajmini hisoblashning vaqt me’yorlari bilan quyidagi hujjat orqali to`liq tanishishingiz mumkin.
