2021-yilning 13-noyabr kuni “O‘zbekiston tarixi” ixtisosligida tayanch doktoranturaga kirish uchun tashkil etilgan imtihon jarayonida ishtirok etgan talabgor, Buxoro davlat universitetining “Buxoro tarixi” kafedrasi o‘qituvchisi Ahmadova Zebiniso Shavkatovna imtihonlar shaffof o‘tmaganligi to‘g‘risida o‘zining ijtimoiy tarmoqdagi sahifasida haqoratomuz so‘zlar bilan Buxoro davlat universiteti va uning rahbariyatini korrupsiya va poraxo‘rlikda ayblab bir qator maqolalar e’lon qilgan edi. Holat bo‘yicha Ahmadova Zebiniso Shavkatovna O‘zbekiston Respublikasi Prezidenti portali, Oliy va o‘rta maxsus ta’lim vazirligi, Buxoro viloyat hokimligi va Buxoro viloyat prokuraturasiga tegishli tartibda murojaat qilgan. Murojaat yuzasidan ushbu tashkilotlar tomonidan o‘rganishlar olib borilib, xususan, Oliy va o‘rta maxsus ta’lim vazirligi tomonidan tayinlangan ishchi guruh a’zolari murojaatchi Ahmadova Zebiniso Shavkatovna bilan uchrashib, murojaatchining imtihon jarayonidan noroziligi sabablari o‘rganilgan va o‘rganish davomida murojaatchi tomonidan ko‘rsatilgan vajlar o‘z tasdig‘ini topmaganligi aniqlangan.Z.Axmadova tomonidan noyabr oyida Buxoro davlat universiteti va rahbariyatiga nisbatan Facebook ijtimoiy tarmog‘i orqali hech bir asoslarsiz butun boshli 90 yillik tarixga ega bo‘lgan Buxoro davlat universiteti sha’nini, mazkur ta’lim dargohida uzoq yillik tajribaga ega bo‘lgan professor-o‘qituvchilarning obro’ va nufuzini ijtimoiy tarmoqlarda obro‘sizlantirish barobarida dunyodagi nufuzli universitetlar qatoriga qo‘shilayotgan oliy ta’lim dargohiga va rahbar xodimlari nomiga dog‘ tushurib, haqoratli gaplar yozib, sha’ni va qadr-qimmatini kamsitganligi, bila turib yolg‘on uydirmalar tarqatib, tuhmat qilganligi va shaxsning qadr-qimmati kamsitilishi yoki uning obro‘sizlantirilishiga olib keladigan yolg‘on ma’lumotlarni internet jahon axborot tarmog‘iga tarqatgani sababli unga nisbatan jinoyat ishlari bo‘yicha Buxoro shahar sudining qaroriga muvofiq 2021-yilning 16-dekabr kuni O‘zbekiston Respublikasi Ma’muriy javobgarlik to‘g‘risidagi kodeksi 40-moddasi (tuhmat), 41-moddasi (haqorat) va 202/2-moddalarida (shaxsning qadr-qimmati kamsitilishiga yoki uning obro‘sizlantirishiga olib keladigan yolg‘on axborotni tarqatish, shu jumladan ommaviy-axborot vositalarida, telekommunikatsiya tarmoqlarida yoki internet jahon axborot tarmog‘ida tarqatish) nazarda tutilgan huquqbuzarliklarni sodir etgan deb topilib, unga nisbatan tegishli jazo chorasi qo‘llanildi.Xalqimizda “Haqiqat egiladi, bukiladi, lekin sinmaydi” deb, bejizga aytilmagan. Tayanch doktoranturaga kirish uchun qonuniylik va shaffoflik tamoyillariga asoslanib o’tkazilgan imtihonlar talabgorlarning bilimini adolatli tarzda munosib baholashga asos bo’ldi. Imtihon jarayonlariga puxta tayyorgarlik ko’rmaganligi sababli yetarli ball to’play olmagan Ahmadova Zebiniso Shavkatovna o‘zi ta’lim olib kamolotga yetgan va bugungi kunda non-tuzini yeb yurgan dargohini ham yuz xotir qilmadi. Qolaversa, hech bir asoslarsiz Buxoro davlat universiteti sha’nini, shuningdek, mazkur universitetda uzoq yillik tajribaga ega bo‘lgan professor-o‘qituvchilarning nufuzini ijtimoiy tarmoqlarda obro‘sizlantiruvchi chiqishlarni amalga oshirmasdan, o‘qituvchiga xos bo’lgan aql va idrok bilan ish tutsa bo’lar edi.Ma’lumki, bugungi kunda yurtimizda ilm-fan rivoji yo‘lida hech qanday to‘siqlar mavjud emas. Respublikamizdagi oliy ta’lim muassasalarida Ilmiy faoliyat bilan shug‘ullanmoqchi bo‘lgan talabgorlarga davlatimiz tomonidan yiliga 4 marta, har chorakda mustaqil izlanuvchilikka kirib, ilmiy faoliyatini olib borishi uchun imkoniyatlar yaratilgan. Oliy ta’limdan keyingi ta’limning tayanch doktoranturasida o‘qiydiganlarga oyiga 4419894 so‘m miqdorida, doktoranturada ta’lim oladiganlar uchun 5674140 so‘m miqdorida davlat byudjeti mablag‘lari hisobidan stipendiya to‘lanadi. 3 yillik o’qish mobaynida muddatidan oldin himoya qilganlarga esa qonunchilikka asosan, stipendiyaning qolgan qismi rag‘bat sifatida to‘lab beriladi. Shu o‘rinda ta’kidlab o‘tishimiz kerakki, guruch kurmaksiz bo‘lmaganidek, ziyoli degan nomga munosib bo‘lmagan kimsalar ham uchrab turadi. Bugun davlatimiz tomonidan ilm-fanni rivojlantirish borasida amalga oshirilayotgan islohotlar, yaratilayotgan shart-sharoitlardan unumli foydalanib, shukronalik bilan jamiyat va davlat uchun manfaat keltirish o‘rniga, o‘z shaxsiy, moddiy manfaatlarini ko‘zlab ish ko‘ruvchilar ham uchramoqda. Bunday kimsalarga aytar so‘zimiz, iltimos, Ilmdan qo‘lingizni torting, shaxsiy g‘arazlaringizda ilmni qurol qilmang. Ilm-fan shunday insonlardan faqat va faqat zarar ko‘radi. Zero, Ilm-fan asrlar davomida faqat bunyodkorlik va mamlakat taraqqiyoti uchun xizmat qilgan. BuxDU Matbuot xizmati
