Har yili oliy ta’limda o`qish istagidagi yoshlar uchun test sinovlari bilan birgalikda kasbiy (ijodiy) imtihonlar o`tkaziladi. Bu turdagi imtihonlarning bosh maqsadi abituriyentlarning tanlangan mutaxassislik bo‘yicha o‘qish va keyinchalik ishlab ketish imkoniyatlarini aniqlash, ularning tanlangan fanlar bo‘yicha bilimlari va malakalari darajalarini, kasbiy ko‘nikmalarini, ijodiy va jismoniy qobiliyatlarini baholashdan iboratdir.Joriy yilda Buxoro davlat universitetida ham kasbiy (ijodiy) imtihonlar yuqori saviyada tashkil etilyapti. Sport faoliyati (kurash, erkin kurash, boks, futbol, voleybol), Sport faoliyati sirtqi, Cholg`u ijrochiligi: xalq cholg`ulari (rubob prima, qashqar va avg`on rubobi), Vokal san’ati: an’anaviy xonandalik, Rangtasvir (Dastgohli) kabi yo`nalishlarda kasbiy (ijodiy) imtihonlar topshirilishi belgilangan. Shu munosabat bilan bugun Buxoro davlat universiteti rektori, professor Obidjon Xamidov Buxoro davlat universitetida kasbiy (ijodiy) kirish imtihonlariga tayyorgarlik jarayoni bilan tanishib chiqdi. Imtihon bo‘lib o‘tishi rejalashtirilgan zallar, stadion va xonalarni ko‘zdan kechirdi. Tashrif chog'ida imtihon o'tkaziladigan xonalar, maydonlarda imtihon jarayonlarida shaffoflikni ta`minlash maqsadida kameralar o'rnatilganligi, abituriyentlar kasbiy (ijodiy) imtihonlarda qatnashishlari uchun barcha kerakli vositalar tayyor ekanligi, ularning ota-onalari imtihon jarayonlarini kuzatib borishlari uchun online translyatsiya yaratilganligi, korrupsion holatlarni oldini olish yo`lida olib borilayotgan amaliy ishlar bilan obdon tanishdi. Uzoq hududlardan tashrif buyuruvchi abituriyentlar uchun universitet yotoqxonasida yaratilgan shart-sharoitlarni ko`zdan kechirdi. Pandemiya sharoitida abituriyentlarning salomatligini muhofaza qilish uchun ko`rilgan choralarni, ular harakatlanadigan hududlarda sanitariya-gigiyena qoidalariga nechog`lik muvofiq shart-sharoit yaratilganini tekshirdi. Kamchiliklar yuzasidan puxta o`ylangan yo`riqnomalar berib o`tildi.Kuzatuv yakunida 2021/2022 o‘quv yili uchun kirish imtihonlarini yuqori saviyada o‘tkazish bo‘yicha mas’ullarga topshiriq berdi. BuxDU Matbuot xizmati
