Buxoro davlat universitetining fizika-matematika fakulteti asrga tatigulik tarixga ega. Bu fakultetdan yetishib chiqqan bir qancha olimlar, malakali mutaxassislar bugungi kunda Respublikamizning turli sohalarida el xizmatiga bo‘lib, mehnat qilib kelishmoqda. Fakultetning bunday yutuqlarga erishishida albatta mashaqqatli mehnat, tartib-intizom, ustoz-shogird an’analarining yo‘lga qo‘yilganligi natijasidir. Har bir talaba taqdiri, ularning odob-axloqi, muomala madaniyati fakultet rahbariyati va o‘qituvchilar nazaridan chetda qolmaydi. Fakultetda, kafedralarda amalga oshirilayotgan ishlar, yoshlarga yaratilayotgan shart-sharoitlar, innovatsion ta’lim texnologiyalaridan foydalanib tashkillashtirilayotgan darslar, o‘tkazilayotgan turli tadbirlarning zamirida yosh avlodni yetuk mutaxassis qilib tarbiyalash, kelajakda Respublikamiz ravnaqiga hissa qo‘shadigan malakali kadrlarni yetkazib berish asosiy maqsad qilib qo‘yilgan. Biz bo‘lajak oliy ma’lumotli pedagoglarni tayyorlaymiz. Shu sababli fakultet ichki tartib qoidalari, odob-ahloq qoidalari asosida talabalarni estetik ruhda tarbiyalab, kiyinish madaniyatini, muomala madaniyatini o‘rgatib borishimiz zarur. Bugungi kunda yoshlarimizga kiyinish odob-ahloq qoidalari haqida, muomala madaniyati haqida o‘qituvchilar, rahbariyat tushuntirish berib nazorat ostiga olmasa, hozirgi qalbi qaynoq yoshlarimiz turli mintaliletimizga mos bo‘lmagan kiyimlar kiyishi, qiz bolalar tor shimlarda, kalta yupkalarda darslarga kelishi, yigit bolalar esa soch-soqollarini tartibga keltirmay darslarga qatnashishi barchamizga sir emas. Bugungi kunda talabalarning yurish-turishiga guruh rahbarlari, ma’sul shaxslar e’tibor qaratishmasa, ayrim ota-onalar talabalarning qanday kiyimda kelishiyu, darsga qatnashmasligi holatlarini nazoratga ham olishmaydi. O‘zbek qizlari darsda shimda o‘tirsa, yigit bolalar soqollarini o‘stirib kelsa guruh rahbarlari talabadan tartib intizomni talab qilmasa biz qanday qilib yosh avlodni tarbiyalaymiz. Bizning talabalar bo‘lajak pedagog bo‘lganligi sababli, o‘zida kiyinish madaniyati shakllanmasa, yurish-turushini nazorat qila olmasa, o‘z hatti-harakatiga nisbatan ma’suliyat hissini uyg‘otmasa, kelajakda qanday qilib yosh avlodni tarbiyalay oladi. Qolaversa, tartib-intizom bor joyda yutuqlar amalga oshiriladi, muvaffaqiyatlarga erishiladi. Fakultetimizda bugungi kunda yoshlarning mukammal bilim olishi, o‘z kasbining mohir ustasi bo‘lib yetishi uchun katta imkoniyatlar yaratilgan. Pandemiya sharoitida ham yoshlarning bo‘sh vaqtlarini mazmunli tashkil qilish maqsadida fakultet rahbariyati tomonidan turli onlayn tanlovlar, onlayn zakovat intellyektual o‘yinlari, ma’naviyat tadbirlari tashkil etildi. Fakultet rahbariyati va Axborot texnologiyalari kafedrasining say’i-harakati bilan yosh dasturchilarni tayyorlash maqsadida “Dasturlash asoslari” to‘garagi tashkil etildi. To‘garak 2 smenada tashkil etilgan bo‘lib, 150 nafargacha talabalarni qamrab olgan. Matematika, fizika fanlaridan to‘garaklar tashkil etilib, samarali faoliyat olib bormoqda. Malakali ustozlar bilan hamkorlikda 200 ortiq iqtidorli talabalar innovatsion loyihalar va ishlanmalar ustida ish olib bormoqda. Buxoro viloyatining IT PARK markazida 8 nafar talaba ish bilan ta’minlanib, bugungi kunda murakkab innovatsion loyihalar ustida ishlab kelayapti. Fakultet talabalari matematika, informatika va fizika fanlardan onlayn olimpiadalarga faol ishtirok etib, faxrli o‘rinlarni egallashdi. Universitet ma’naviyat bo‘limi tomonidan 5 tashabbus doirasida tashkil etilgan turli tanlovlarda fakultet talaba-yoshlari faol ishtirok etib, turli darajadagi diplom va faxriy yorliqlari bilan mukofotlanishdi. Fakultet talabalari uchun “Fiz-mat fakulteti” rasmiy kanali tashkil etilgan bo‘lib, har bir talabaning erishgan yutuqlari, muvaffaqiyatlari e’lon qilinib, talabalarga ijobiy motivatsiyalar berib boriladi. Fakultet rahbariyati va homiy tashkilotning ko‘magi yordamida 7 nafar iqtidorli talaba va ijtimoiy himoyaga muhtoj talabalarga noutbuk sovg‘a qilindi. Fakultetda yoshlar ittifoqi yetakchilari tashabbusi bilan har yili o‘tkazib kelinayotgan quvnoqlar va zukkolar tanlovi talabalarning sevimli tanloviga aylanib ulgurgan. Har bir talaba muammosi fakultet rahbariyati tomonidan o‘rganib chiqilib, amaliy yordam ko‘rsatiladi. Talabalarni yotoqxona masalalari bilan ta’minlash maqsadida bir qancha amaliy ishlar bajarib kelinmoqda. Yotoqxonada va ijarada turadigan talabalar holidan ustozlar doimo xabardor bo‘lib, ular bilan turli uchrashuv va tadbirlar tashkil etib borishadi. Yotoqxonada barcha shart-sharoitlar univerisitet rahbariyati tomonidan ta’minlab berilgan. Yotoqxonada talabalarning bo‘sh vaqtlarini mazmunli tashkil etish maqsadida turli tadbirlar tashkilashtirib kelinmoqda. Turar joyga ehtiyoji bor talabalarning murojaatlari universitet rahbariyati, dekanat va guruh rahbarlari bilan hamkorlikda ish olib borib, amaliy yordam ko‘rsatilmoqda. Pandemiya sabab tashkil etilgan onlayn darslar talabalar tomonidan yaxshi o‘zlashtirib borilmoqda. Aksariyat talabalar onlayn darslardan ko‘ra an’anaviy ta’limni afzal ko‘rishadi. Bizning fakultet mutaxassislik fanlari ancha murakkabroq bo‘lganligi sababli talabalar onlayn darsdan ko‘ra, an’anaviy dars shaklida mavzularni yaxshi o‘zlashtirishadi, tushunmagan tushunchalarini ustozlaridan so‘rab o‘rganishadi. Shu sababli talabalarimizning deyarli barchasi dars jarayonlarini intiqlik bilan kutishmoqda. Ijtimoiy tarmoqlarda muhokamalarga sabab bo‘layotgan turli isbotsiz ma’lumotlarni tarqatib, talabalar o‘rtasida forma masalasi, yotoqxona masalalarini o‘z tushunchasi talqinida muhokama qilayotgan bloggerlar ham qaysidir ustozdan tarbiya olganku. Talabaga tanbeh bergan, uni to‘g‘ri yo‘lga boshlayotgan ustozlarimizni ijtimoiy tarmoqlarda turli nojo‘ya gaplar bilan obro‘siga putur yetqazsak, ularni sababi isbotlanmagan muhokamalar markaziga tashlasak, yosh avlodni qanday tartibda tarbiyalay olamiz? Qolaversa, isbotlanmagan ma’lumotlar asosida bir oliy dargohini tanqid qilsak, uning barcha yutuqlarini tan olmay, qayerdagi gaplarning ketidan yugursak, yosh avlod jizzaki, ma’suliyatsiz bo‘lib voyaga yetmaydimi? Biz pedagoglar har bir talabani o‘z farzandimizday ko‘ramiz, uning taqdiriga befarq bo‘la olmaymiz. Talabalarning har bir muammosi fakultet rahbariyati, ustozlari ko‘magida hal qilinadi va amaliy yordam ko‘rsatiladi.BuxDU Matbuot xizmati