Yoshlarning ijodiy, intellektual va tadbirkorlik salohiyatini ro‘yobga chiqarish, innovatsion g‘oyalar, loyihalar va texnologiyalarni ishlab chiqarishga joriy qilish, olimlar va tadbirkorlarning innovatsion faoliyatini rag‘batlantirish, ilm-fan, ta’lim va ishlab chiqarish integratsiyasini kuchaytirish uchun zarur shart-sharoitlar yaratish maqsadida Buxoro davlat universiteti hamda “Yoshlar kelajagimiz” jamg‘armasi o‘rtasida universitetda biznes akselerator faoliyati yo‘lga qo‘yilmoqda.Shu maqsadda tomonlar o‘rtasida o‘zaro hamkorlik kelishuvi imzolandi. Kelishuv doirasida Buxoro davlat universiteti hamda “Yoshlar kelajagimiz” jamg‘armasi O‘zbekiston Respublikasi Konstitusiyasi, O‘zbekiston Respublikasining 2016 yil 14 sentyabrdagi “Yoshlarga oid davlat siyosati to‘g‘risida”gi qonuni hamda mamlakatimizda yoshlarga oid boshqa normativ-huquqiy xujjatlarga tayangan holda, belgilangan maqsad va vazifalarini izchil amalga oshirilishini ta’minlash borasida o‘zaro hamkorlikni yo‘lga qo‘ymoqda.Tomonlarning o‘zaro hamkorligi quyidagi yo‘nalishlarni qamrab oladi:- Buxoro davlat universitetida biznes akselerator faoliyatini yo‘lga qo‘yish;- Talabalarning startap loyihalarini qo‘llab-quvvatlash va moliyalashtirishda ko‘maklashish;- Ta’lim va malaka oshirishdagi boshqa loyihalar.Buxoro viloyatida tadbirkorlik muhitini, startaplar ekosistemasini rivojlantirish, yoshlar tashabbuslarini qo‘llab-quvvatlash, hududdagi ijtimoiy muammolarni hal etishda innovasion vositalar va yechimlar ishlab chiqish hamda universitet bazasida yoshlar biznes akseleratorini tashkil etish o‘zaro hamkorlikning asosiy maqsadi hisoblanadi.Akselerator startaplarga qanday yordam beradi? Buni quyidagilarda ko‘rishimiz mumkin:- Biznes sohasida tayanch bilimga ega bo‘lish. O‘zbek startaplari uchun bu ayniqsa muhim. Ko‘p kishilar qandaydir mobil dasturni yaratish kifoya, u yog‘iga o‘zi pul ishlab topaveradi, deb o‘ylaydi. Mana shunday yosh tadbirkorlar uchun biznes-dasturlar juda muhim.- Akseleratorning o‘zi loyihaning muvaffaqiyat qozonishini kafolatlamaydi, biroq yangi imkoniyatlarni ochadi. Agar jamoa loyihaga butunlay sho‘ng‘ib ketsa, KPIni bajarsa, ustozlarni to‘g‘ri tanlay bilsa, butun biznes-strategiyani o‘ylab chiqsa, unda akseleratorni o‘rab turgan hamjamiyatga uning muvaffaqiyatlari seziladi.- Investorlar akseleratorlardan yaxshi loyihalarni ko‘z ostiga olib qo‘yadi (biroq bu investisiyalarni kafolatlamaydi). Har bir akseleratorning manfaatdor investorlardan iborat o‘z bazasi bo‘ladi.Yuqoridagi vazifa va maqsadlardan kelib chiqib, universitetda biznes akselerator faoliyatini yo‘lga quyish maqsadida, barcha sharoitlarga ega bo‘lgan 4 ta xonani o‘z ichiga olgan hudud ajratildi. Ushbu xonalar zaruriy ehtiyojlarni hisobga olgan holda, universitet va jamg‘arma tomonidan eng so‘nggi talablar asosida, mebel va ofis jihozlari, so‘nggi rusumdagi kompyuter texnologiyalari hamda printer moslamalari, 55 dyuymli zamonaviy aqlli monitor, internet, akselerator a’zolari uchun o‘ziga xos stol va stullar bilan jihozlandi.Biznes uchrashuvlarni hamda tinglovchilar uchun tadbirkorlik sohasidagi o‘quv kurslarini amalga oshirish uchun barcha sharoitlar yaratildi. Biznes akseyerator a’zolari va tinglovchilari uchun Buxoro davlat universiteti Iqtisodiyot kafedrasi tomonidan 20 soatga mo‘ljallangan “Zamonaviy tadbirkorlik asoslari” maxsus kurs o‘quv dasturi yaratildi hamda tomonlar tomonidan tasdiqlandi. Ushbu dastur yaratilishida zamonaviy tadbirkor sohasidagi tendensiyalar inobatga olindi. Ushbu dastur bo‘yicha tadbirkorlar hamda bo‘lajak tadbirkorlarni zamonaviy metodlar asosida o‘qitish nazarda tutilgan. Shuningdek, hozirgi kun talabidan kelib chiqib frilanserlik faoliyati, qishloq ho‘jaligi hamda turizm faoliyati bo‘yicha o‘quv dasturlari ishlab chiqilmoqda. Ushbu mashg‘ulotlarga namuna sifatida Buxoro davlat universiteti hamda “Yoshlar kelajagimiz” jamg‘armasi tomonidan o‘z sohasida yutuqqa erishgan va istiqbolli tadbirkorlar taklif etilishi rejalashtirilmoqda.IT, startap va innovasion loyihalar ishlab chiqish hamda amaliyotga tadbiq etishda oliy o‘quv yurtlari talabalarining potensialini ko‘tarish va axborot-kommunikasiya texnologiyalari sohasida yoshlar tashabbuskorligini oshirish maqsadida ushbu kelishuv doirasida biznes akselerator huzurida “Robototexnika” bo‘limi faoliyati yo‘lga qo‘yildi. Ushbu bo‘lim uchun maxsus sharoitlarga ega hamda kerakli jihozlar bilan ta’minlangan xona ajratildi. Ushbu xonada yoshlarning axborot texnologiyalari hamda robototexnika sohasida o‘z g‘oyalarini amalga oshirishlari uchun barcha imkoniyatlar yaratildi. Tomonlar biznes akselator faoliyati orqali yoshlarni ish bilan ta’minlash, ularda muhandislik ko‘nikmalarini shakllantirish va innovasion faoliyatga bo‘lgan qiziqishini uyg‘otish, shuningdek, hududning ijtimoiy holatini yaxshilashga umid bildiradi.Ilmiy-innovatsion ishlanmalarni tijoratlashtirish bo'limi boshlig'i O.O. SayfulloyevBuxDU Matbuot xizmati