Kuni kecha Buxoro davlat universiteti Xorijiy tillar fakulteti filologiya va tillarni o'qitish ta'lim yo'nalishi 11-6, 7 ing-19 guruhi talabalari murabbiy Z.M. Majidova boshchiligida Navro'z bayrami munosabati bilan navbatdagi xayriya tadbirini tashkil qildilar. Ma'lumki, o'zbek xalqi azaldan o'zining mehribon va bolajonligi bilan ajralib turadi. Bayramlarda, hayit ayyomlarida qarindosh-urug', yoru-do'stlarni yo'qlash, shu kunlarda birodarlarga yanada ortiqroq hurmat ko'rsatish biz uchun azaliy qadriyat. Ayniqsa keksa, yordam va e'tiborga tashna insonlarni ayyomlarda tabriklab, issiq nonlar bilan xonadonlariga tashrif buyursak, ham ularning, ham o'zimizning xursandchiligimizga xursandchilik qo'shiladi. Shunday shukuh bilan bu gal talabalar Buxoro shahrida joylashgan Xo'ja Porso mahallasida istiqomat qiluvchi keksa va imkoniyati cheklangan insonlar xonadonlariga tashrif buyurib, ularga oziq-ovqat mahsulotlarini taqdim etdilar. Xonadon egalarining bunday xayriya ehsonlardan qalblari tog'dek ko'tarilib, talabalarni ko'pdan-ko'p duo qildilar. Tadbirda ishtirok etgan fakultet dekani M.M. Jo'rayeva barcha oila a'zolarni yaqinlashib kelayotgan Navro'z bayrami bilan qutlab, ularga iliq tilaklarini izhor etdilar.
