Ma'lumki, 2020 yilning yanvar oyida AQSh elchixonasi tomonidan "Spelling Bee" xalqaro tanloviga hujjatlar qabul qilinishi boshlanganligi e'lon qilingan edi. Mazkur tanlovning viloyat bosqichi kuni-kecha BuxDU Xorijiy tillar fakulteti Ingliz tilshunosligi kafedrasida faoliyat olib borayotgan AQShlik o'qituvchi Mina Gavel tomonidan o'tkazildi. Tanlov Buxoro shahrida joylashgan Ibn Sino nomidagi kutubxonada bo'lib o'tdi va unda 20 dan ortiq yoshlar ishtirok etdilar. Ishtirokchilar orasida BuxDU Xorijiy tillar fakulteti talabalari ko'pchilikni tashkil etdi. Tadbir boshida Mina Gavel tomonidan tanlov shartlari tanishtirildi. Ishtirokchilarning vazifasi hay'at a'zolari tomonidan aytilayotgan so'zlarni harfma-harf talaffuz qilish bo'ldi. Tanlov uch bosqichda o'tkazildi. Filologiya va tillarni o'qitish ta'lim yo'nalishi talabasi Abdiyeva Nargiza beshinchi o'rinni egalladi. Yuqori o'rinlarni 3-4 bosqich talabalari egalladilar. Bular: 1-o'rin Sarvinoz Hakimova, 2-o'rin Hikoyatxon Nurova, 3-o'rin Saodat Majidova. Aynan ana shu uch talaba tanlovning Toshkent shahrida bo'lib o'tadigan respublika bosqichida qatnashadilar. Mazkur tanlov keyinchalik MDH davlatlari o'rtasida Bishkek shahrida bo'lib o'tadi. BuxDU ning g'olib talabalariga eng yuqori o'rinni egallashlarini tilab qolamiz.
