“Ilm o`rganish Allohdan qo`rqish, uni talab qilish ibodat, bilmaganni o`rganish sadaqa, ilm tanholikda hamroh, xilvatda do`st, to`g`ri yo`l ko`rsatuvchi dalil, begonalar oldida – eng sodiq do`st, jannat yo`lining minorasidir”- degan edi xalqimizning ardoqli yozuvchisi Said Ahmad. Darhaqiqat, ilm insonga Alloh tomonidan ato etilgan va uni boshqa mavjudotlardan ko`ra oliy zotga aylantirgan ilohiy kuchdir. Odamzodga ilmdan saboq berishdek ma`suliyatni o`z bo`yniga olgan insonlar haqiqiy hazrat insondirlar. Ta`kidlash joizki, insoniyat qadimidan hozirigacha o`zgarishlar va yangilanishlar makonida yashab kelgan. Bu borada ilm-fanning o`rni albatta, beqiyos. Buxoro viloyati Buxoro shahridagi tarix faniga ixtisoslashtirilgan davlat umumta`lim maktabida bo`lib o`tgan viloyat miqyosidagi o`quv-amaliy seminar ham mazkur o`zgarishlar, yangilik va tajriba hamda ta`limdagi innovatsiyaga bag`ishlandi. Tarix fani chuqur o`rgatiladigan ushbu dargohda tarix fanini o`qitishda bir necha innovatsion metodlardan foydalanib kelinmoqda. Mazkur seminar esa, o`zaro tajriba va fikr almashinuviga ilmiy maydonni yarata oldi. Seminarning tafsilotlari haqida so`z borganda, maktab pedogagik jamoasi tashkilotchiligiga alohida urg`u berib o`tish joizdir. Erta tongdan maktab eshiklarida saflangan sarbozlar seminar ishtirokchilariga tarix faniga doir savollar berib ularning sohaga doir bilimlarini sinovdan o`tkazdilar. Kiraverishda tashkil etilgan xalq amaliy va ijodiy san`ti na`munalari, xususan, kulolchilik, gilamchilik, misgarlik va tasviriy san`at na`munalari seminar ishtirokchilariga haqiqiy buxorocha ruhni his etishiga xizmat qildi. Ayniqsa, taxtiravonda o`tirgan Buxoro amiri va uning mulozimlari e`tiborni o`ziga tortadi. Maktab iqtidorli o`quvchilari tomonidan tayyorlangan buxorocha raqslar barchaga shodiyona kayfiyat ulashdi. “Innovatsion g`oyalarga asoslangan ixtisoslashtirilgan ta`lim – davr talabi” mavzusida tashkil etilgan o`quv-amaliy seminar ishtirokchilari jam bo`lgandan so`ng, uch guruhga bo`lindilar. Birinchi guruh G. Temirovaning 8-"B" sinfi bilan tashkil etilgan “Xiva xonligining tashqi siyosati” mavzusidagi ochiq darsda, ikkinchi guruh S. Rahmonovaning 9-sinflar bilan tashkil etilgan “Oila – jamiyatning negizi” mavzusidagi to`garak mashg`ulotida va uchunchi guruh BuxDU talabalari bilan hamkorlikda tashkil etilgan sayohat darsida qatnashdilar. Kunning ikkinchi yarmida ishtirokchilar maktab tarix muzeyi bilan yaqindan tanishib, maktab “Tarixiy drama” to`garagi a`zolari tomonidan tayyorlangan “Bu muqaddas vatanda azizdir inson” nomli madaniy kecha guvohi bo`ldilar. Shundan so`ng, ishtirokchilar maktab pedogagik jamoasi tomonidan tashkil etilgan kofe-breykdan bahramand bo`ldilar. Maktabda tashkil etilgan “Kichik Akademiya” markazi bir necha yildan buyon soha mutaxasislarining yetishib chiqishida katta bir maktab bo`lib xizmat qilmoqda. Shuningdek, eng so`nggi navbat “Kichik Akademiya” a`zolarining taqdimot dasturlariga berildi. Hozirgacha akademiya a`zolari turli jabhalarda o`zlarini namoyon etib, katta yutuqlarga erishmoqdalar. Xususan “Kichik Akademiya” rahbari Buxoro davlat universiteti Tarix va madaniy meros fakulteti Buxoro tarixi kafedrasi dotsenti, fan nomzodi M. Qurbonova tomonidan qilinayotgan say`- harakatlar tufayli akademiya a`zolari katta marralarga erishmoqda. Ta`bir joiz bo`lsa, mazkur o`quv-amaliy seminarni tashkil etishda o`z hissasini qo`shgan tashkilotchilar Buxoro shahar XTB xodimi M. Qobilova, 6-IDUM rahbari M. Shoyimardonova, maktabning oliy toifali o`qituvchisi D. Shoyimardonova, maktab ixtisoslashtirilgan sinflar bo'yicha direktor o'rinbosari G. Raxmatova, tajribali pedagoglar L. Rashidova, Z. Saidova va maktab pedagagik jamoasining mehnatini e`tirof e`tish o`rinli bo`ladi. Zero, ilm yo`lida qilinayotgan bu kabi ishlar kelajakda albatta, o`z mevasini berajak. BuxDU Matbuot xizmati xodimi Javohir Saidov
