Aziz ustozlar va talabalar!Yana bir necha soatlardan so‘ng 2019 yil tarix sahifalaridan joy olib, bizni yangi marralar sari yo‘llovchi 2020 yilni qarshi olamiz. Sizlarni qutlug‘ qadamlar bilan kirib kelayotgan Yangi – 2020 yil bilan chin dildan muborakbod etaman. Faol investitsiyalar va ijtimoiy rivojlanish yili deb nom berilgan 2019 yilda yurtimiz hayotida yaxshi kunlar, ulkan yutuqlar va marralar ko‘p bo‘ldi.Shu bilan birga 2019 yil Siz azizlarning fidokorona mehnatlaringiz evaziga universitetimiz hayotida ham muhim voqealarga, ulkan natijalarga va bunyodkorliklarga boy yil bo‘lganini alohida ta’kidlash joiz.Joriy yilda Buxoro davlat universiteti xorijiy davlatlarning oliy ta’lim muassasalari bilan hamkorlikni yanada mustahkamladi. Ushbu hamkorliklar natijasida dunyoning rivojlangan mamlakatlari nufuzli oliy ta’lim muassasalaridan 10 dan ziyod yetakchi mutaxassis va olimlar talabalarimizga ma’ruzalar o‘qishdi, 2 nafar professor-o‘qituvchilarimiz o’zlarining dissertatsiyalarini xorijda himoya qilishdi.Universitetda ilmiy salohiyatni oshirish maqsadida 2019 yilda 20 nafar doktorant-mustaqil izlanuvchilar (PhD) ilmiy daraja hamda 6 nafar fan doktori DSc ilmiy darajasiga ega bo‘ldilar. Ma’naviyat va ma’rifat, madaniyat va sport sohasida qilingan ishlar, qo‘lga kiritilgan yutuqlar ham o‘ziga xos salmoqqa ega. Yakunlanayotgan yilda sportchi talabalarimiz tomonidan xalqaro va respublika miqyosida o‘tkazilgan sport musobaqalarida 10 dan ortiq oltin, 15 yaqin kumush va 10 dan ortiq bronza medallarini qo‘lga kiritishgani buning yaqqol dalilidir. Universitetimizda tahsil olayotgan talabalar soni ko‘payishi barobarida o‘quv binolarimiz soni ham uchtaga ko‘payib, fakultetlarimiz 12 taga yetdi. Universitetimizda tahsil oluvchi talaba yoshlarning yutuqlari bilan birga, 5 nafar talabalarimizning O‘zbekiston Respublikasi bakalavrlari uchun ta’sis etilgan nomdor stipendiyalarni qo‘lga kiritgani olib borilayotgan tizimli ishlarning samarasi desak, mubolag‘a bo‘lmaydi. Albatta bu erishilayotgan yutuqlar jamoaning mehnati va salohiyati bilan amalga oshirilmoqda.Yangi yil – bu shunchaki yangi taqvimning boshlanishi emas, Yangi yil – biz uchun yangi umidlar, yangi muvaffaqiyatlar va g‘alabalarning boshlanishidir. Kirib kelayotgan 2020 yilda ham universitetimiz jamoasi bundanda katta rejalarni amalga oshirishni mo‘ljallamoqda.Qadrli ustozlar, muhtaram professor-o‘qituvchilar, aziz talabalar kirib kelayotgan Yangi – 2020 yil xonadoningizga fayzu baraka, xotirjamlik, baxtli va farovon hayot olib kelsin. Sizlarga ijodiy ko‘tarinkilik, o‘qish va izlanishda shijoat, baland marralarni egallash yo‘lida muvaffaqiyatlar tilayman! Yurtimiz osmoni doimo musaffo, vatanimiz taraqqiyoti hamisha bardavom bo‘lsin.Yangi yilingiz muborak bo‘lsin aziz ustozlar va talabalar!Buxoro davlat universiteti rektori O.X. Xamidov
