Buxoro davlat universiteti filologiya fakulteti huzurida 10.00.01 – Oʼzbek tili, 10.00.02 – Oʼzbek adabiyoti, 10.00.11 – Til nazariyasi, 10.00.08 – Folklorshunoslik, ixtisosliklarida filologiya fanlari boʼyicha doktorlik (DSc) va falsafa doktori (PhD) dissertatsiyalari muhokamasi uchun tashkil etilgan ilmiy seminar (№1061-U.19 noyabr 2019) ning 2020 yil 22 yanvarda boʼlib oʼtgan 21 - yigʼilishida oʼzbek adabiyoti kafedrasi dotsenti Sh.А. Hayitov tomonidan taqdim etilgan “Аlisher Navoiy nasrida komil inson obrazi” mavzusidagi 10.00.02 – Oʼzbek adabiyoti ixtisosligida filologiya fanlari doktori (DSc) ilmiy darajasini olish uchun taqdim etilgan dissertatsiyasi muhokamasi boʼlib oʼtdi. Muhokamada dissertant tomonidan Navoiy nasrida ilm va ijod ahli, soʼfiylar, futuvvat maslagi vakillari, shoh va shahzodalar va bir qator ijtimoiy tabaqa vakillarining barkamol shaxs timsoli sifatida badiiy talqin qilinganligi ilmiy asoslab berildi, Аlisher Navoiyning shoh va amaldorga munosabati negizida odil jamiyat va fozil shaxs gʼoyasi turishi, adolat maqomiga esa ulugʼ adibning sabr, shukr, rostlik, qanoat, saxovat, hilm, vazminlik, tavakkul, rizo kabi komillikka olib boruvchi ruhoniy manzillarni bosib oʼtish orqali erishish mumkinligi haqidagi qarashlari ochib berildi. Ilmiy seminar muzokara va muhokamaga boy tarzda oʼtdi.
