“O‘zimdagi barcha yaxshi fazilatlar uchun kitobdan minnatdorman!” – degan edi donishmandlardan biri. Darhaqiqat, kitob insonni yomonliklardan saqlaydi, ezgu amallarga da’vat etadi. Mana shu haqiqat kitobga oshno qalblarni yana bir bor birlashtirdi. Buxoro davlat universitetining filologiya fakulteti filologiya va tillarni o‘qitish (o‘zbek tili) ta’lim yo‘nalishi 6-4UZB-19-guruhida “Eng faol bilimdon kitobxonlar” ko‘rik-tanlovining saralash bosqichi bo‘lib o‘tdi.Talabalar uch guruh (“Urfon”, “Zukkolar”, “Ma’rifat”) kesimida Said Ahmadning “Ufq” trilogiyasi, Abdulla Avloniyning “Turkiy guliston yoxud axloq” asari hamda Aleksandr Dyumaning “If qal’asining mahbusi” romanlari asosida o‘z bilimlarini sinovdan o‘tkazishdi. Jamoalar “Asar muallifi haqida qisqacha ma’lumot berish”, “O‘rganilgan badiiy asarga qisqacha annotatsiya keltirish”, “O‘rganilgan badiiy adabiyot bo‘yicha lavhalardan parcha yoki monolog aytib berish”, “Asardan iqtiboslar keltirish”, “Asar mavzusiga oid rasmlar, videorolik va musiqalar taqdim etish”, “kitob haqida qisqacha esse taqdim etish”, “Asar bo‘yicha kichik sahna ko‘rinishi namoyish etish” shartlari asosida hakamlar hay’ati tomonidan munosib baholab borildi. Qizg‘in bahslardan so‘ng “Zukkolar” jamoasi g‘olib deb topildi. Tadbir so‘ngida filologiya fanlari bo‘yicha falsafa doktori, dotsent G.I. Toirova so‘zga chiqib, tanlovda faol ishtirok etgan talabalarni alohida e’tirof etdi. Ularga keyingi ishlarida muvaffaqiyatlar tilagan holda kitoblar ulashdi.
