Buxoro davlat universitetida xorijiy mamlakatlarning yetakchi oliy taʼlim muassasalari bilan hamkorlik aloqalari kengayib bormoqda. Ushbu oʼquv yilidan boshlab, jami 5 ta xorijiy OTM bilan hamkorlikda 4 ta bakalavriat hamda 3 ta magistratura qoʼshma dasturlari tashkil qilingan boʼlib, ulardan bir nechtasining ramziy ochilish marosimi oʼtgan hafta viloyat hokimi Oʼ.I. Barnoev ishtirokida oʼtkazilgan edi. 18 noyabr kuni Indoneziyadan tashrif buyurgan katta delegatsiya bilan uchrashuv boʼlib oʼtdi. Bandung texnologiya instituti (QS reytingida 331-oʼrin) rektori prof. K.Suryadi, Hasanuddin universiteti rektori prof. D.А.T. Pulubuhu hamda Indoneziya universiteti (QS reytingida 296-oʼrin), Eyrlangga universiteti (QS reytingida 651-oʼrin) kabi yetakchi OTMlardan 30 nafarga yaqin olimlar bilan uchrashuvda BuxDU prorektorlari, dekanlar, kafedra mudirlari ishtirok etishdi. BuxDU rektori O.Xamidov universitet hayoti va asosiy koʼrsatkichlar bilan tanishtirib oʼtgandan soʼng, Bandung texnologiya instituti, Hasanuddin universiteti hamda Eyrlangga universiteti bilan oʼzaro hamkorlik memorandumi imzolandi. Memorandumlar doirasida oʼzaro oʼqituvchi hamda talabalar almashish, qoʼshma ilmiy tadqiqotlar olib borish, konferentsiya va seminarlar tashkil qilish borasida kelishib olindi. Uchrashuvdan soʼng mehmonlar Gunadarma universiteti koʼmagida tashkil etilgan Indoneziya markazi hamda ushbu universitet bilan joriy yilda tashkil etilgan "Turizm (raqamli turizm)" magistratura dasturining ramziy ochilish marosimida ishtirok etishdi. Indoneziya markazi Gunadarma universitetining moliyaviy koʼmagi hisobidan tashkil qilingan boʼlib, ushbu markazda hamkorlikdagi qoʼshma dastur talabalari taʼlim olishadi, shuningdek kelajakda baxasa (Indoneziyaning rasmiy tili) kurslari tashkil qilinishi mumkin. Mehmonlar shu kuni Gunadarma universitetiga joʼnab ketayotgan magistrant talabalarga oq yoʼl tilab, oʼqishlarida muvaffaqiyatlar tilashdi. Delegatsiya aʼzolari BuxDU muzeyida ham boʼlib, universitet tarixi va bugungi kuni bilan yaqindan tanishishdi.
