Ma’lumki, Buxoro davlat universiteti Rossiya Federatsiyasining Qozon Federal universiteti, Isroil davlatining Xolon texnologiya instituti hamda Fransiya davlatining VATEL mehmonxona va turizm biznes maktabi bilan yaqin hamkorlikni boshlagan edi. Bugun, 4 noyabr kuni mazkur uch xorij davlati oliy ta’lim dargohlarining Buxoro davlat universiteti bilan Qo‘shma ta’lim dasturlarining ramziy ochilish marosimi bo‘lib o‘tdi. Unda viloyat mutasaddilari, oliy ta’lim muassasasi professor-o‘qituvchilari, mahalliy va chet ellik talabalar, ommaviy axborot vositalari vakillari ishtirok etdilar.Tadbir avvalida BuxDUning xalqaro hamkorlik bo‘yicha prorektori Abror Jo‘rayev ta’lim tizimida kechayotgan islohotlar samarasi, xalqaro oliy ta’lim dargohlari bilan olib borilayotgan qo‘shma loyihalar amaliyoti, kengayib borayotgan kadrlar ilmiy-nazariy tajriba almashinuvi xususida batafsil to‘xtaldi.Shundan so‘ng viloyat hokimi O‘ktam Barnoyev oliy ta’lim dargohlari o‘rtasida ishlab chiqilayotgan Qo‘shma hamkorlik dasturlari yuqori malakali kadrlar, xalq xo‘jaligi uchun yosh mutaxassislar yetishtirib chiqarishda katta ahamiyatga ega ekanligi, chunonchi, viloyatimizda sayyohlik sohasini rivojlantirishda qator sa’y-harakatlar boshlangani, yangidan qurib, foydalanishga topshirilayotgan zamonaviy mehmonxonalar soni tobora oshgani barobarida ularda servis sohasini takomillashtirish, xorij tajribasini o‘zlashtirish, umuman, bu borada malakali kadrlarga ehtiyoj kuchayib borayotganini alohida ta’kidladi.Bilamizki, Qo‘shma ta’lim dasturi deganda, xorij davlatining hamkor universiteti yoxud instituti bilan o‘quv dasturlarini bir-biriga muvofiqlashtirgan holda talabalarni yagona maqsad yo‘lida o‘qitish, tanlangan mutaxassislikka muvofiq, bilim va ko‘nikmalarini oshirish, ta’lim davri tugaganidan so‘ng bitiruvchilarga har ikki oliy ta’lim dargohi diplomini berish nazarda tutiladi. Quvonarlisi, Buxoro davlat universitetida joriy o‘quv yilidan boshlab 5 ta xorijiy hamkor oliy ta’lim muassasasi bilan 4 ta bakalavriat yo‘nalishida, 3 ta magistratura yo‘nalishida mutxassislar tayyorlash yo‘lga qo‘yildi. Chet eldan hamkor tanlashda eng kuchli oliygohlar tanlanayotgani ham loyihalar istiqboliga qat’iy ishonch bilan qaralayotgani nishonasidir. Masalan, Fransiyaning VATEL mehmonxona va turizm biznes-maktabi 2016 yilda jahonning mehmonxona menejmenti bo‘yicha eng yaxshi ta’lim muassasasi deb tan olingan. Xuddi shunday, Isroilning Xolon hamda Rossiya Federatsiyasining Qozon federal universitetlari ham xalqaro “Times” hamda “QS” reytinglarida o‘z o‘rni va mavqeiga ega. Xolon – zamonaviy texnologiyalar sohasida ishlab chiqilayotgan patentlari tufayli Isroilda yetakchi ta’lim dargohidir. Shu boisdan xorijiy hamkorlar bilan biotexnologiya, agronomiya, iqtisodiyot, kimyo-fizika, maktabgacha ta’lim, sport ta’limi va boshqa yo‘nalishlarda bakalavriat va magistratura bosqichlarida Qo‘shma loyihalar tayyorlanmoqda. –Ayni paytda universitetimizdagi mavjud barcha ta’lim auditoriyalari texnik jihozlarni bir nuqtadan boshqarish imkonini beruvchi “E-minbar”lar, kuzatuv kameralari, kunlik davomadni qayddan o‘tkazuvchi barmoq izi va feys-kontrol uskunalari bilan ta’minlanmoqda,-deydi xalqaro hamkorlik bo‘yicha prorektor Abror Jo‘rayev.–Bu elektron tizim afzalligi shundaki, o‘qituvchining dars o‘tish uslubi ancha qulay va rejalashtirilgani barobarida ish faoliyatining samarali mexanizmi vujudga keladi. Talaba uchun esa vaqtdan unumli foydalangan holda ta’lim sifati birmuncha yaxshilanadi.Loyihalar taqdimotiga qaytsak, Buxoro davlat universiteti Qozon federal universiteti bilan “Iqtisodiyot” mutaxassisligida bakalavriat yo‘nalishida, Xolon texnologiya instituti bilan amaliy matematika va informatika, shuningdek, axborot texnologiyalari borasida bakalavriat yo‘nalishida, xuddi shunday, VATEL mehmonxona va turizm biznes-maktabi bilan Xalqaro mehmonxona menejmenti mutaxassisliklari uchun bakalavriat yo‘nalishida yaqin hamkorlikni boshladi. Taqdimotda bildirilganidek, har ikki mamlakat oliy ta’lim dargohlarida o‘qib, bilim-ko‘nikmasini oshiradigan bittiruvchi talabalarga ikki davlat shahodatlangan diplomlari beriladi.manba:https://t.me/bux_turizm
