Buxoro davlat universitetida xalqaro hamkorlikni kuchaytirish, qoʼshma dasturlarni yoʼlga qoʼyish, ilmiy aloqalarni kuchaytirish borasida salmoqli ishlar olib borilmoqda.Bu borada Rossiya Federatsiyasining oliy taʼlim muassasalari bilan ham aniq yoʼnalishlarda oʼrnatilgan hamkorlik alohida ahamiyat kasb etadi. Joriy yilning 1-10 oktabr kunlari Buxoro davlat universiteti delegatsiyasi M.V. Lomonosov nomidagi Moskva davlat universiteti, Moskva davlat pedagogika universitetida xizmat safarida boʼlib qaytishdi. Safar davomida mazkur oliy taʼlim muassasalari va Buxoro davlat universiteti oʼrtasida ilgari imzolangan hamkorlik shartnomalarining bajarilishi, xususan, Buxoro davlat universiteti oʼqituvchilarining Jismoniy madaniyat va Sport psixologiyasi taʼlim yoʼnalishlari boʼyicha malakasini oshirish, qoʼshma taʼlim dasturlarini takomillashtirish, yaqin istiqbolda birgalikda ilmiy –amaliy anjumanlar oʼtkazish kabi masalalalar atroflicha koʼrib chiqildi. Rossiya Federatsiyasining mazkur nufuzli oliygoh rahbarlari bilan boʼlib oʼtgan uchrashuvda ikkala davlat OTMlari tomonidan olib borilayotgan oʼzaro manfaatli hamkorlik ishlari nafaqat yuqori malakali kadrlar tayyorlash, balki davlatlar oʼrtasidagi doʼstona munosabatlarni yanada mustahkamlashga xizmat qilishi alohida qayd etildi. Buxoro davlat universitetining yuqorida koʼrsatilgan yoʼnalishlar boʼyicha alohida tashabbuskorligi va faolligining eʼtirofi sifatida Moskva davlat universiteti va Moskva davlat pedagogika universiteti tomonidan 31 dona rus tilidagi badiiy, oʼquv-ilmiy adabiyotlar sovgʼa qilindi. Mazkur adabiyotlar universitet Аxborot-resurs markaziga topshirildi. BuxDU matbuot xizmati xodimi: Javohir Saidov
