Oʼzbekiston Respublikasi Prezidentining “Iqtidorli yoshlarni aniqlash va yuqori malakali kadrlarni tayyorlashning uzluksiz tizimini tashkil etish chora-tadbirlari toʼgʼrisida”gi 2019 yil 3 maydagi PQ-4306 sonli qarorini ijrosini taʼminlash maqsadida joriy yilning 13 oktabr kuni Buxoro davlat universiteti va Italiyaning Piza universitetlari hamkorlikda Buxoro davlat universitetida “Buxoro ochiq matematika olimpiadasi” oʼtkazildi. Olimpiadaga Respublikamizning turli viloyatlaridan kelgan umumtaʼlim maktablarining 7-11 sinf, akademik litseylarning 1-2 bosqich va kasb-hunar kollejlarining 3-bosqich oʼquvchilari ishtirok etishdi. Olimpiadada oʼquvchilar ikki guruhda boʼlingan holda, yaʼni 7-9 sinf hamda 9-11 sinf va akademik litseylarning 1-2 bosqich hamda kasb-hunar kollejlarining 3-bosqich oʼquvchilari oʼrtasida oʼtkazildi. Umumtaʼlim maktablarining 9-sinf oʼquvchilari oʼz xohishlariga koʼra 7-9 sinf yoki 9-11 sinflar guruhida qatnashdilar.Topshiriqlar yozma ish shaklida boʼlib, 5 ta masala berildi va har bir masala 7 ballik tizimda baholandi. Ishtirokchilarga masalalarni yechish uchun 4 soat ajratildi.Musobaqa tugagandan soʼng, Matematika kafedrasi mudiri Toʼlqin Rasulov va Oʼzbekiston Respublikasi Xalq taʼlimi vazirligining fan olimpiadalari boʼyicha iqtidorli oʼquvchilar bilan ishlash departamentining yetakchi mutaxassisi Sardor Bazarbaevlar oʼquvchilar oʼrtasida Buxoroda matematikani rivojlantirish va olimpiada masalalarini yechish yoʼllari boʼyicha mahorat darsi oʼtkazib, oʼquvchilarni yanada koʼroq matematika bilan shugʼullanishga ilhomlantirdilar.Shu bilan bir qatorda, Toʼlqin Rasulov Buxoro viloyatining matematik olimlari, Matematika kafedrasining xorijiy davlatlar bilan aloqalari va Buxoro davlat universitetining matematikani rivojlantirish boʼyicha olib borilayotgan tadbirlar haqida soʼzlab berdi. Sardor Bazarbaev xalqaro olimpidalarini oʼtkazilish tartiblari va musobaqada berilgan masalalarni yechish yoʼllari haqida soʼzladi. Oʼquvchilar oʼzlarini qiziqtirgan savollarni berib, javoblardan qoniqish hosil qilishdi.
