Hurmatli universitet jamoasi hamda talabalari Sizlarni kirib kelayotgan yangi – 2017 yil bilan samimiy muborakbod etib, barchangizga tinchlik-omonlik, sihat-salomatlik, xonadonlaringizga qut-baraka tilaymiz.
Mana, hurmatli hamkasblar va talabalar vaqtning azim daryodek shiddat bilan o’tishiga yana bir bor guvoh bo’lib, yangi yilga, hayotimizning yangi bir dovoniga qadam qo’yish arafasidamiz.
O’tayotgan yilni kuzatar ekanmiz, 2016 yil davomida boshimizdan kechirgan, yon-atrofimizda bo’lib o’tgan tashvishli va quvonchli voqealarni, amalga oshirgan ishlarimizni beixtiyor ko’z o’ngimizdan o’tkazamiz, shu kunlarga etkazgani uchun Yaratganimizga shukronalar bildiramiz.
BuxDU hayotida yuz berayotgan beqiyos o’zgarishlarni, oliygohimizning qiyofasi tobora obod va go’zal bo’lib borayotganini hisobga olib, oxiriga etayotgan yilimizga yakun yasab, xolisona aytadigan bo’lsak, 2016 yil biz uchun har tomonlama xosiyatli va fayzli bo’ldi, deb aytishga barcha asoslarimiz bor. Bunga barchamiz guvoh bo’lganmiz va o’zimiz ishtirok etib faxrli o’rinlarni qo’lga kiritganmiz.
2016 yilda universitet professor-o’qituvchilari va talabalari, shuningdek, badiiy jamoalari viloyat hamda respublika miqyosida o’tkazilgan turli ma’naviy-ma’rifiy tadbirlar, ilmiy-nazariy anjumanlar, ko’rik-tanlovlarda bir necha bor sovrinli o’rinlarni zabt etdilar. Jumladan, “Eng yaxshi ma’naviyat targ’ibotchisi”, “Tafakkur sinovlari”, “Talabalar teatr studiyasi”, “Quvnoqlar va zukkolar”, “Yagonasan, muqaddas Vatan!”, “Yuksak ma’naviyatli avlod”, “Yurt kelajagi” kabi respublika iqtidorli yoshlar tanlovlarida ishtirok etib, g’oliblikni qo’lga kiritdilar.
Ayniqsa ushbu ko’rik-tanlovlar hamda universitetda amalga oshirilgan ma’naviy-ma’rifiy ishlarni tizimli ravishda amalga oshirgan soha vakillariga alohida minnatdorchilik bildiramiz.
Shular qatorida universitet jamoasi va yoshlarining ma’naviy va intellektual saviyasini yuksaltirish, ilm-fan, ta’lim-tarbiya, sog’liqni saqlash, madaniyat, sport va turli gumanitar tarmoqlarni yangi, zamon talab qiladigan bosqichga ko’tarish biz uchun doim ustuvor yo’nalishlar qatorida bo’lib kelmoqda.
Agar bugungi zamon qanday shiddat bilan o’zgarib borayotganini hisobga oladigan bo’lsak, bu sohalarga, avvalo, ta’lim-tarbiya sohasiga e’tiborimizni yanada kuchaytirishimiz talab etiladi.
Chunki zamon o’zgarishi bilan odam, inson ham o’zgaradi, uning dunyoqarashi, hayotga, hayotdagi o’z roli va burchiga munosabatlari va qarashlari bir holatda turmaydi.
Ayniqsa, talaba-yoshlarimizni jismoniy va ma’naviy jihatdan etuk va barkamol insonlar etib tarbiyalash borasida amalga oshirayotgan ishlarimizni yanada takomillashtirishimiz kerak bo’ladi.
Mamlakatimizda yangi yilga “Xalq bilan muloqot va inson manfaatlari yili” deb e’lon qilinishi orqali yurtimizda amalga oshirilayotgan demokratik jarayonlarning sifati va natijadorligini tubdan oshirish, insonning huquqlari, erkinliklari va manfaatlarini, shu jumladan odamlar hayotining munosib darajasini ta’minlash, ular amalga oshirilishi uchun davlat organlarining roli va mas’uliyatini kuchaytirish, aholi bilan ochiq muloqotni yo’lga qo’yish va ularning murojaatlari bilan ishlashning yangi samarali mexanizmlari va usullarini joriy etish, fuqarolarni bezovta qilayotgan hayotiy muammolarni o’z vaqtida hal etish, "Inson manfaatlari har narsadan ulug’" degan ezgu g’oyani hayotga izchil joriy etish uchun aniq maqsadga qaratilgan keng ko’lamdagi chora-tadbirlarni amalga oshirish ustuvor vazifa etib belgilandi.
Barchangizni kirib kelayotgan yangi – 2017 yil bilan yana bir bor qizg’in tabriklaymiz.
Fursatdan foydalanib muhtaram faxriylarimizning umrlari uzoq bo’lishini, munis ayollarimizning chehrasidan tabassum arimasligini, dilbar qizlarimiz yanada go’zal va chiroyli, baxtli-saodatli bo’lishini, yoshlarimizning baxtu iqbolini berishini tilab qolamiz.
Yurtimiz tinch, xalqimiz omon bo’lsin!
Yangi yil barchamizga muborak bo’lsin!
