Bugun Buxoro davlat universitetida 9-dekabr "Butunjahon korrupsiyaga qarshi kurashish kuni" munosabati bilan ma'naviy-ma'rifiy tadbir bo'lib o'tmoqda. Tadbirni Buxoro davlat universiteti rektori, iqtisodiyot fanlari doktori, professor Obidjon Xafizovich Xamidov ochib berdi. Tadbirda O'zbekiston Respublikasi Senat a'zosi Xuseynova Abira Amanovna, Viloyat prokuraturasi Korrupsiyaga qarshi kurashish bo'limi boshlig'i Laziz Ahadov, Xo'ja Ismat Jome' masjidi imomi Salohiddin Domla fakultet dekan o‘rinbosarlari, bo‘lim boshliqlari, kafedra mudirlari, professor–o‘qituvchilar, Yoshlar ittifoqi fakultet yetakchilari, guruh sardorlari qatnashdilar.
Tadbirni universitet rektori O.X.Xamidov kirish so‘zi bilan ochib, bugungi tadbirda ishtirok etadigan ma’ruzachilar bilan tanishtirib o‘tdi. Shuningdek, Muhtaram Prezidentimizning 2019 yil 24 va 28 may kunlari oliy ta’lim muassasalari rahbarlari va soha vakillari bilan bo‘lgan uchrashuvda o‘quv dargohlarida ta’magirlik bilan bog‘liq bo‘lgan holatlar chuqur tahlil qilinib, bu illat qattiq qoralanganligi, Prezidentimiz tomonlaridan korrupsiya ta’lim -tarbiya tizimi uchun eng katta xavf va birinchi raqamli dushman sifatida e’tirof etilganligini ta’kidlab o‘tdi. Universitet rektori O.X.Xamidov o‘z nutqida talaba-yoshlar shuningdek, professor-o‘qituvchilar, xodimlar orasida bu illatning oldini olish, korrupsiyaga oid huquqbuzarliklarni barvaqt aniqlash va o‘z vaqtida bartaraf etish maqsadida soha mutaxassislari hamkorligida universitetda ham davra suhbatlari, uchrashuvlar, profilaktik tadbirlar o‘tkazib kelinayotganligi o‘z samarasini ko‘rsatayotganligini uqtirib o‘tdi. Shuningdek, bu yil o‘qishga qabul qilish test sinovlarining pandemiya sharoitida keng stadionlarda tashkil etilishi, yoshlarga ko‘pgina imtiyozlar berilishi, talabalarning rektor bilan to‘g‘ridan-to‘g‘ri muloqot qilishi, Davlat xizmatlari agentligi bilan hamkorlikda ishlarning amalga oshirilishi bunga yaqqol misol bo‘la oladi.
Shuningdek tadbirda so’z navbati O‘zbekiston Respublikasi Senati a’zosi, viloyat Oila markazi rahbari A.A.Xusenovaga berildi: Assalomu alaykum aziz yig‘ilish ishtirokchilari! Kuni kecha biz qomusimiz O‘zbekiston Respublikasi Konstitusiyasining 28 yilligi munosabati bilan tashkil etilgan tadbirlarda ishtirok etdik. Qonunni bilish unga amal qilish nechog‘lik barchamiz uchun yuksak taraqqiyot va rivojlanishimizga turtki desam adashmayman. Bugungi kunda ijtimoiy hamda iqtisodiy sohalarda olib borilayotgan islohotlarning o‘zbek xalqiga xizmat etayotganligini barcha e’tirof etmoqda. “Mehr-3” operatsiyasining amalga oshirilishi hamda shaxsan Prezidentimiz Sh.M.Mirziyoyev tomonidan nazorat qilinishi davlatning o‘z fuqarolariga befarq emasligidan dalolat beradi. 73 nafar bolalar, shulardan 13 tasi chin yetim ekanligi ayanchli holat. Tinch, farovon mamlakatda yashayapmiz. Har bir onimizni g‘animat bilib yashashimiz kerak. Shukrni o‘rganishimiz kerak. Mamlakat taraqqiyoti, kelajagi uchun fuqarolar ham birdek yondashib yashashni o‘rganishi kerak. Huquqiqiy burchimiz, erkinligimizni anglashimiz, huquqiy savodxonligimizni, madaniyatimizni oshirib borishimiz davr talabi bo‘lib kelmoqda. Korrupsiyaga tushunchasiga to‘xtalib o‘tsak, uning asl ma’nosi yemirish degani, ya’ni millatni, taraqqiyotni, davlatni, kelajakni yemirish degani. Aynan unga qarshi kurashish uchun, oldini olish uchun Prezidentimiz tashabbuslari bilan maxsus organ agentlik tashkil etildi. Uning tashkil etilganligi bejiz emas. Buni o‘z vazifasi, xizmatini suiste’mol qilgan holda shaxsiy manfaatlarini ustun qilib, jamiyat hamda millat taraqqiyotiga bolta urayotgan shaxslar davlat oldida javob berishi qattiq nazorat etilishi deb tushunamiz. Yoshlarimizga yuzlanib shuni aytmoqchi edimki, barcha fanlarni o‘qib, o‘z vaqtida o‘rgansangiz sizda hech qanday muammo bo‘lmaydi. Birorta o‘qituvchi sizga manfaat bilan qaramaydi.
So‘z navbati viloyat prokuraturasi “Korrupsiyaga qarshi kurashish” bo‘limi boshlig‘i L.Ahadovga berildi:
Assalomu alaykum aziz yig‘ilish ishtirokchilari! Bugungi yig‘ilishni interaktiv usulda olib borsak. Siz qiziqtirgan savolga javob bersak. Korrupsion jinoyat nima ekanligi borasida suhbatlashsak. Muhtaram Prezidentimiz ham O‘zbekiston Respublikasi Bosh prokuroriga ham uch sohani korrupsiyadan holi qilishda ma’lum topshiriqlar berib o‘tdilar. Bu oliy ta’lim sohasi, tibbiyot sohasi hamda qurilish sohasidir. Bu albatta bejiz emas, bu uch sohadagi korrupsiya holati inqirozini biz ertaga qaytara olmaymiz. Bu holatda kelajak avlod ilmsiz, oqsaydigan, mustaqil fikrlay olmaydigan, shaxsiy manfaatlarini ustun qo‘yadigan bo‘lib qolishi ehtimoldan xoli emas. Birgina huquq-tartibot organlarining sa’y harakatlari bilan bu narsaga erishib bo‘lmaydi. Bunda xalq, jamiyat ham hamkor bo‘lsa natijaga erishib bo‘ladi. Bunda albatta, avvalo talaba o‘ziga xos bilimlarni o‘z vaqtida egallab borishi, fanlarni o‘zlashtirishi korrupsiyaning oldini olishda yordam beradi. Hozir shu borada rolikni namoyish etsak.
Korrupsion holatlar olidini olishda xizmat etadigan 2 ta ijtimoiy rolik namoyish etildi.
So‘z navbati “Xo‘ja Ismat” jome’ masjidi imom xatibi S.Gadoyevga berildi:
Bugun siz talabalar bilan shunday ulug‘ maskanda, ziyo o‘chog‘ida uchrashib turganimizdan bag‘oyat xursandmiz. Yurtimizda hozirda katta islohotlarning bo‘lib o‘tayotganligi hamda ushbu islohotlarning amalga oshishi, yurtimizning kundan kunga obod bo‘lishi, Vatanimiz, shahrimizning gullab yashnashi, ravnaq topishi uchun albatta ilm kerak. Ilmni yaxshi o‘zlashtirish uchun halol, pokiza rizq kerak. Islom dini hamisha insoniyatni halollikka, ezgulikka, pok rizqlanishga chorlaydi. Zero, halol rizq insonning duosi ijobat bo‘lishligiga sabab bo‘ladi. Halol rizq insonning qalbini nurafshon qiladi. Qalb ravshan, pok bo‘lsa, bunday qalbda ilm o‘rnashar ekan. Shuning uchun biz Payg‘ambarimiz hadislariga, o‘gitlariga, o‘tgan ajdodlarimiz hayotlariga nazar solsak, ularning barchalari halol rizq payida bo‘lganliklari, haromdan hazar qilganliklarini guvohi bo‘lamiz. Chunki muqaddas Qur’oni Karim kitobida ham Alloh “Ey iymon keltirgan bandalar, o‘zaro oralaringizdagi molu mulkni harom yo‘l bilan yemanglar”deb buyuradi.Muoz ibn Jabal (r.a) bir kuni Payg‘ambarimiz oldilariga kelib “Ey Rasululloh, meni haqqimga duo qilsangiz. Duom ijobat bo‘ladigan bandalardan bo‘lay” deya so‘radi. Shunda Rasululloh barcha ummatlariga pandu-nasihat qildilar “Ey Muoz, duong ijobat bo‘lsin desang, xalqumingni pokla, kabingni pokla”. Shundan ko‘rinib turibdiki, haromdan hazar qil, halol kasb qilib, halol rizq topib, duomiz, amallarimiz, ibodatlarimiz ijobat bo‘lishiga erishamiz. Barchamiz Allohdan manfaatli ilm, aqlu farosat, qabul bo‘ladigan amal, keng rizq so‘rashimiz uchun halol yashashimiz kerak.
So‘z navbati Buxoro shahar Adliya boshqarmasi bo‘limi boshlig‘i A.Bafoyevga berildi:
O‘zbekiston Respublikasi Prezidenti Sh.M.Mirziyoyevning mamlakatni rivojlantirishni maqsad qilgan har qanday davlat ilm-fan va ma’rifatga katta e’tibor qaratishi lozimligini alohida e’tirof etganlar. Tarixdan ma’lumki, yurtimiz sarhadlarida 9-11 asrlarda Somoniylar, 14-15 asrlarda Temuriylar hukmronligi davrida ilm-ma’rifatga alohida e’tibor qaratilgan. Natijada uyg‘onish davrlari kuzatilib, buyuk mutafakkirlar, olimu ulamolar yetishib chiqib yurtimizni butun jahonga tanitishgan. Hozirda hukumat rahbarimizning bunga alohida e’tibor qaratgani bejiz emas. Bu har qanday davlatni qisqa muddat ichida rivojlantirishga qodir omil hisoblanib, ilm- fanni rivojlantirish asosiy strategiya qilib belgilab olingan. Hukumat rahbari tashabbuslarini hayotga tadbiq etish va .yurtimizni chinakkam rivojlangan davlatlar qatoriga qo‘shish uchun barchamiz ularni qo‘llab-quvvatlashlarimiz darkor. Ta’kidlash lozimki, Prezidentimiz tomonidan ilm-ma’rifatni takomillashtirish va rivojlantirish maqsadida hozirga qadar bir qator tashabbuslar ko‘rsatilgan bo‘lib, ular hozirning o‘zida ijobiy natijalar berib kelmoqda. Biroq hukumatimiz rahbarini qattiq tashvishga solgan va bezovta bo‘lishga sabab bo‘lgan eng og‘ir illat bu korrupsiya balosi bo‘lib qolmoqda. Ushbu illat mamlakatimizning ilm ma’rifatini takomillashtirishda va mamlakatni rivojlantirishda jiddiy muammo deb sanalmoqda. Men o‘ylaymanki, bugungi uchrashuvda barcha fikr mulohazalar to‘g‘ri talqin qilinadi.
Tadbir davomida so‘zga chiqqan Viloyat IIB Korrupsiya va iqtisodiy jinoyatlarga qarshi kurash bo‘limi katta tezkor vakili V.V.Adizov barcha ishtirokchilarga kuzatilgan korrupsion holatlar yuzasidan hamkorlikda ishlar tashkil etilganligi, shuningdek, loqaydlik, befarqlik asosida yashashni unutib, Yangi O‘zbekistonni barpo etishda yakdillik bilan ishlarni amalga oshirish maqsadga muvofiq bo‘lishi to‘g‘risida gapirib o‘tdi.
Tadbir so‘ngida Yoshlar bilan ishlash, ma’naviyat va ma’rifat bo‘limi tomonidan korrupsion holatlarning vujudga kelishi va bu borada jinoyatchilarning jinoiy javobgarlikka tortilishi borasidagi videorolik barcha ishtirokchilar tomonidan tomosha qilindi.
