Bu gulshan ichra yo'qtir baqo guliga sabot,Ajab saodat erur yaxshilik bila chiqsa ot. Inson qalbining quvonch-u qayg‘usini, ezgulik va hayot mazmunini Navoiydek teran ifoda etgan shoir jahon adabiyoti tarixida kamdan-kam topiladi.Bugun Buxoro davlat universiteti faollar zalida Alisher Navoiy tavalludining 578 yilligiga bag'ishlangan "Hazrat Navoiyga ehtirom" nomli badiiy-kompozitsion tadbir bo'lib o'tdi. Maktabgacha va boshlang'ich ta'lim fakulteti dotsenti M.Ro'ziyeva hamda boshlang'ich ta'lim yo'nalishi 3-bosqich talabalari tashkillashtirgan tadbir musobaqa tarzida "Simurg" va "Yetti go'zal" jamoalari ishtirokida ajoyib chiqishlar bilan bo'ldi. - Ona tiliga muhabbat, uning beqiyos boyligi va buyukligini anglash tuyg‘usi ham bizning ongu shuurimiz, yuragimizga avvalo Navoiy asarlari bilan kirib kelgan desak xato bo'lmaydi, - deydi M.Ro'ziyeva. Biz bu bebaho merosdan xalqimizni, ayniqsa, yoshlarimizni qanchalik ko‘p bahramand etsak, milliy ma’naviyatimizni yuksaltirishda, jamiyatimizda ezgu insoniy fazilatlarni kamol toptirishda shunchalik qudratli ma’rifiy qurolga ega bo‘lamiz. Tadbirning 1-shartida jamoalar o'z guruhlarini tanishtirib, A.Navoiyning hayoti va ijod haqida ma'lumot berishdi. 2-shartda 2ta jamoa Navoiy g'azallaridan namunalar aytishdi.Barchaga manzur bo'lgan 3-shartda talabalar "Xamsa" dostonidan sahna ko'rinishlari namoyish qilishdi. 4-shartda esa jamoalar erkin mavzuda Navoiy asarlarini bugungi kun bilan bog'lab go'zal chiqishlar qilishdi. Tadbir natijalariga ko'ra "Simurg" jamoasi g'olib bo'ldi. Bunday tadbirlar yoshlar ma'naviyatini yuksaltirishda, ularni o'tmish ajdodlarimizga hurmat ruhida tarbiyalashga xizmat qiladi. Zilola Po'lotova Maktabgacha va boshlang'ich ta'lim fakulteti media guruh rahbari.
