Viloyatimiz vakili—ko‘rik-tanlov g‘olibiO‘zbekiston XDP "Istiqbol" yoshlar qanoti tashabbusi bilan o‘tkazilgan "Yosh siyosatchi — 2017" ko‘rik-tanlovining respublika bosqichi bo‘lib o‘tdi. 2008 yildan buyon o‘tkazilayotgan tanlov yoshlarning siyosiy-huquqiy bilimini oshirish, iste‘dod va iqtidorini ro‘yobga chiqarish, tashabbuslarini qo‘llab-quvvatlashda muhim ahamiyat kasb etmoqda."Men Vatanim ravnaqiga hissa qo‘shishni xohlayman!" shiori ostida o‘tkazilgan tanlovdan ko‘zlangan maqsad yurtimizda yoshlarga oid davlat siyosatining amaldagi ijrosini ta‘minlash, yoshlarda faol fuqarolik pozitsiyasini shakllantirish, islohotlarga daxldorlik tuyg‘usini kuchaytirish singari ustuvor vazifalarga qaratilgan.4 bosqichdan iborat bo‘lgan bellashuvda viloyatimiz vakili – Buxoro davlat universiteti tarix fakulьteti o‘qituvchisi Shavkat Bobojonovning loyihasi birinchi o‘ringa munosib deb topildi.— O‘zbekiston Xalq demokratik partiyasining "Istiqbol" yoshlar qanoti faoliman, —deydi tanlov g‘olibi biz bilan suhbatda.—Mazkur tanlovda "Yosh restavratorlar guruhi" loyihasi bilan qatnashdim. Ayni payt¬da Buxoro shahridagi Ark qo‘rg‘onidan Minorai Kalongacha bo‘l¬gan hududda kechki Shahriston bozori qurilishi rejalashtirilgan. Bundan tashqari, 14 joyda ta‘mirlash ishlari olib borilyapti. U yerda asosan, Qoraqalpog‘iston, Farg‘ona vodiysi, Xorazm va shahrisabzlik ustalar kelib ishlamoqda. Viloyatimizda 660 ta madaniy meros ob‘ektlari mavjud bo‘lib, lekin ularni ta‘mirlash ishlarida buxorolik yoshlarning ishtiroki sezilmayapti. Buning sabablarini o‘rganib, ta‘mirlovchi ustalarni o‘zimizda tayyorlashimiz kerak, degan xulosaga keldim. Tarixdan ma‘lumki, viloya¬timizda1930 yillarda Usta Shirin nomidagi ta‘mirlash va me‘morlash ustaxonasi faoliyat yuritgan. Unda 300 nafar professional me‘morlar ishlagan. Ayni paytda bu maktabning 15 nafar vakili hayot. Ular bilan suhbatlashib, ustoz-shogird an‘anasi asosida yoshlarga hunar o‘rgatishlariga kelishdik. Yosh restavratorlar guruhi ishga tushsa, koshinkorlik, shara¬falarni¬ ta‘mirlash, ganch va yog‘och o‘ymakorligi, umuman, me‘morchilik texnologiyasi bo‘yicha 10 yo‘nalishda yosh ustalar tayyorlanadi. Bu ko‘plab yangi ish o‘rinlari yaratilishiga ham asos bo‘ladi. Shuningdek, yoshlarni ajdodlar merosiga hurmat ruhida tarbiyalashga xizmat qiladi.Dildora IBROHIMOVA, "Buxoronoma" muxbiri.
