2017 yil 1 mayda Buxoro davlat universitetida O’zbekiston Respublikasi Prezidentining “OLIY TA’LIM TIZIMINI YANADA RIVOJLANTIRISH CHORA-TADBIRLARI TO’G’RISIDA”gi qarori ijrosini ta’minlash maqsadida “2017-2021 yillarda Oliy ta’lim tizimini kompleks rivojlantirish dasturi” mavzusida Ilmiy kengash tashkil etildi.Unda universitetning barcha professor-o’qituvchilari hamda qishloq xo’jalik fanlari doktori, O’zbekiston Milliy universiteti professori, 11 nafar fan doktori, 14 nafar fan nomzodiga ilmiy rahbarlik qilib, tuproqshunoslik va agrokimyo bo’yicha 1-o’zbek akademigi bo’lgan Jo’raqul Sattorovich Sattorov ishtirok etdi. Akademik J.S.Sattorov Prezidentimiz Sh.M.Mirziyoevning akademiklar bilan uchrashuvida yoshlarimizni o’zimiz xohlagandek tarbiyalash uchun barcha imkoniyatlardan foydalanish zarurligi haqidagi muhim fikrlarini eslatib, mazkur qarorning bu boradagi alohida ahamiyatini uqdirdi. Shundan so’ng universitet rektori A.A.To’laganov Oliy ta’lim tizimini kompleks rivojlantirish dasturining muhim tamoyillari haqida ma’ruza qildi. Prezident qarorining har bir bandi bo’yicha alohida to’xtalib, iqtidorli talaba yoshlar, ilmiy tadqiqotchilar, professor-o’qituvchilar va olimlar uchun yaratilayotgan imtiyozlar, yangilik va o’zgarishlar haqida batafsil ma’lumot berdi. Xususan, professor o’qituvchilarning xorijda malaka oshirishi, shuningdek pedagog kadrlar malakasini oshirish va qayta tayyorlashda chet ellik olimlarni taklif etishning ahamiyatli tomonlari, malakali, ilg’or tajribali professor o’qituvchilarni rag’batlantirish uchun rektor jamg’armasi tuzilganligi, shuningdek, qarordan ko’zlangan asosiy maqsad respublikamiz oliy ta’lim tizimida Garvard, Oksford darajasidagi ta’lim sistemasini yaratish kerakligi kabilar asoslab berildi. Umuman, “Oliy ta’lim tizimini yanada rivojlantirish chora-tadbirlari to’g’risida”gi qaror va undan ko’zlangan maqsad barcha professor-o’qituvchilarga teran anglatildi. Shu ma’noda universitet professorlari, prorektorlar, kafedra mudirlari mazkur qaror to’g’risidagi fikr-mulohaza hamda takliflarini bayon qildilar.