Buxoro davlat universitetida Konstitutsiyaviy qonun loyihasi bo‘yicha o‘tkazilgan targ‘ibot tadbirida so‘zga chiqqan “Milliy tiklanish” demokratik partiyasi Markaziy kengashi raisi Alisher Qodirov mamlakatimizdagi tarixiy jarayon – yangilanayotgan Konstitutsiya mazmun-mohiyati, ahamiyati haqida gapirdi.
Yangi O‘zbekiston tom maʼnoda ulkan o‘zgarishlarga yuz tutdi. “Inson qadri uchun” g‘oyasi asosida barcha sohalarda tub islohotlar amalga oshirilmoqda. Eng muhimi, xalqimizning siyosiy qarashlari o‘zgarib, tafakkuri oshdi. Endi bu o‘zgarishlarning huquqiy asosini mustahkamlash uchun amaldagi Konstitutsiyaga o‘zgartishlar kiritish hayotiy zaruratga aylandi.
Maʼlumki, Konstitutsiya shaxs, jamiyat va davlatning o‘zaro munosabatlarini tartibga soladi. Qabul qilinayotgan har qanday meʼyoriy-huquqiy hujjatlar eng avvalo, Konstitutsiyaga asoslanadi. Shu jihatdan, Bosh Qonunimiz zamondan orqada qolib ketmasagina, shiddat bilan olib borilayotgan islohotlarimizning huquqiy asosi bo‘lib xizmat qila oladi.
Taʼkidlanganidek, yangilanayotgan Konstitutsiyada oliy taʼlim tashkilotlariga akademik erkinlik, o‘zini o‘zi boshqarish, tadqiqotlar o‘tkazish va o‘qitish erkinligi huquqi taqdim etilmoqda. Konstitutsiyamizga ushbu normaning kiritilishi professor-o‘qituvchilar va talabalarning o‘quv jarayonidagi mustaqilligini taʼminlashga xizmat qiladi. Jumladan, keyingi yillarda ko‘plab nodavlat oliy o‘quv yurtlari ochildi, xorijiy universitetlar filiallari soni ortmoqda, 41 ta davlat oliy o‘quv yurtiga akademik va moliyaviy mustaqillik berildi.
– Elektoratimiz tomonidan bildirilgan takliflarning aksariyati Konstitutsiyaviy qonun loyihasida aks etganini g‘urur bilan ayta olamiz. Yangilanayotgan Konstitutsiyada partiyamizning eng ustuvor maqsadlari hisoblangan milliy qadriyatlarimizni asrab-avaylash, taʼlim-tarbiya, o‘qituvchilarni har tomonlama qo‘llab-quvvatlashda davlatning majburiyatlari, ota-ona, farzandlar burchi, oiladagi tarbiya bilan bog‘liq ishlarga davlatning g‘amxo‘rlik qilishi kabi masalalar o‘z aksini topdiki, bu ayni sohalardagi hayotiy muammolarga dadil yechim topish imkonini beradi, – dedi Alisher Qodirov.
