Buxoro davlat universitetida xalqaro hamkorlik sohasida muayyan ishlar amalga oshirilib, xorijiy oliy taʼlim muassasalari bilan ilmiy hamkorlikni rivojlantirishga alohida eʼtibor qaratilmoqda. Bugungi kunda universitetning 15 nafarga yaqin tadqiqotchisi jahon akademik reytinglarida yuqori 1000 talikka kiruvchi universitetlar doktoranturasida taʼlim olmoqda. Doktorantura doirasidagi tadqiqotlarning bir nechtasi qo‘sh rahbarlik asosida olib borilmoqda. PhD dissertatsiyalarini muvaffaqiyatli himoya qilganlar xorijiy hamkor universitetning diplomini olish qatorida, ushbu diplomlar O‘zbekiston Respublikasi OAK tomonidan qo‘shimcha imtihonlarsiz nostrifikatsiya qilinishi taʼminlanadi.
16-sentabr kuni Ispaniyaning Santyago de Kompostela universitetida (QSda 751-800, Timesda 801-1000, ARWUda 401-500, US Newsda 553-o‘rinda) BuxDU tadqiqotchisi Olim Rahimovning “Agrar sohani liberallashtirish sharoitida Buxoro viloyatida suv resurslaridan foydalanish samaradorligi tahlili” mavzusidagi dissertatsiyasi himoyasi bo‘lib o‘tdi. Dissertatsiya ishiga rahbarlik BuxDU rektori prof. Obidjon Xamidov hamda SDKU professori Tomas Kuesta tomonidan amalga oshirildi. Ilmiy tadqiqot ishi dastlab Yevropa Ittifoqining Erasmus Mundus dasturi, keyinchalik “El-yurt umidi” jamg‘armasi hamda BuxDU tomonidan qo‘llab-quvvatlangan ilmiy stajirovka dasturlari doirasida amalga oshirildi. Dissertatsiya himoyasi Santyago de Kompostela universiteti, Korunya universiteti, Migel Ernandes nomli universitet vakillaridan tashkil topgan komissiya tomonidan qabul qilindi.
