Qadrli viloyatimiz yoshlari, maktab bag`ridan katta hayot ostonasiga qadam qo`yayotgan bitiruvchilar!
Bugungi bayram “Yoshlar kuni” munosabati bilan barchangizni samimiy muborakbod etaman.
Siz qadam qo`yayotgan yo`l shijoat talab etadigan, mehnat va zakovat bilan erishiladigan marradir. O`zbekistonda Uchinchi Renessans poydevorini yaratishda ilm olishga chog`langaningiz, uning eng muhim bo`g`inlari bo`lgan maktab, oliy ta’lim va ilmiy-madaniy dargohlarda ma’lumotli, yetuk kadr bo`lish uchun jahd bilan harakat qilayotganingiz e’tirofga sazovor.
Bugungi kun yoshlari, barkamol, jahon darajasidagi bilimlarni o`zlashtirishga, o`z qobiliyati, loyihalarini amaliyotda tadbiq etishga harakat qilishi, bu borada ko`plab natijalarga erishib, O`zbekiston dovrug`ini dunyoga yoyayotgani kishini xursand qiladi. Ana shunday yoshlar safida sizning ham o`z ulushingiz, hissangiz bor.
Bugungi shiddatli zamonda, global miqyosda raqobat kuchayib borayotgan murakkab vaziyatda yuksak intellektual salohiyatga ega, ko`p tillarda erkin muloqot qiladigan, axborot-kommunikatsion texnologiyalarini yuqori saviyada bilish qatorida ularni yarata oladigan kadrlarga ehtiyoj har qachongidan ham ortib bormoqda. Sizda al-Xorazmiy, ibn Sino, Farobiy-u Beruniylar, hazrat Navoiy-u Mirzo Ulug`bekdek olimlarimizning natijalarini ko`rishni istaymiz. Aytish kerakki, shu ezgu niyatimizga mos, o‘z tengdoshlariga ibrat bo‘layotgan, jamiyatdagi yangilanishlar jarayonida faol ishtirok etayotgan yoshlarimiz sizning orangizda benihoya ko‘p.
Aziz yoshlar! Sizni bayram bilan yana bir bora qutlayman. Ilm olish mobaynida chekkan mashaqqatingiz mevasini ko`rishingizni, O`zbekistonning zabardast, navqiron, peshqadam va yuragida olovi bor azm-u shijoatli farzandlari bo`lishingizni, hamisha, hammavaqt qadr va e’zoz topib, ravnaqimizga o`z munosib hissangizni qo`shishingizni tilayman.
Hurmat bilan
Xamidov Obidjon Xafizovich,
Buxoro davlat universiteti rektori,
iqtisodiyot fanlari doktori, professor
