O’zbekiston Respublikasi Vazirlar Mahkamasining 2021-yil 9-sentyabrdagi “Respublikada oliy ta’lim muassasalarida talabalarni turar joy bilan qamrab olish darajasini oshirish chora-tadbirlari to‘g‘risida”gi 563-sonli qarorida Davlat-xususiy sheriklik asosida oliy ta’lim muassasalari moddiy texnik bazasini rivojlantirishni jadallashtirish va talabalar turar joylarini barpo etish belgilangan.
Buxoro davlat universiteti tomonidan Buxoro viloyati, Buxoro tumani, Robitaqalmoq MFY, Buxoro davlat universitetiga tegishli bo’lgan (0.3 gektar) yer maydonida 400 o’rinli talabalar turar joyi binosini Vazirlar Mahkamasining 563-sonli qarori 1-bandi a-kichik bandiga muvofiq qurish va faoliyatini tashkil etish bo’yicha davlat tashabbusi bildirildi.
Mazkur loyihada tadbirkorlik subyektining o‘z mablag‘lari hisobidan talabalar turar joyi barpo etiladi va davlat-xususiy sheriklik to‘g‘risidagi bitim amal qiladigan muddat davomida davlat sherigi tomonidan xususiy sherikka talabalar turar joylaridan erkin foydalanilishi uchun to‘lov to‘lanadi.
Bunda, davlat sherigi ushbu to‘lovni talabalardan har oy yashash uchun yig‘iladigan to‘lovlarni chegirgan holda har bir talaba uchun bazaviy hisoblash miqdorining yillik 10 baravari miqdorida o‘z mablag‘lari hisobidan kafolatlanadigan to‘lovlar hamda bazaviy hisoblash miqdorining yillik 15 baravari miqdorida O‘zbekiston Respublikasining Davlat budjetidan ajratiladigan subsidiya hisobidan amalga oshiradi. Talabalar turar joyini saqlash va ekspluatatsiya qilish bilan bog‘liq barcha xarajatlar xususiy sherik hisobidan qoplanadi.
Bundan tashqari, O‘zbekiston Respublikasi Prezidentining 2019 yil 11 iyuldagi “Oliy va o‘rta maxsus ta’lim tizimiga boshqaruvning yangi tamoyillarini joriy etish chora-tadbirlari to‘g‘risida” PQ-4391-sonli qaroriga asosan barpo etiladigan bino va inshootlarning talabalarga taqdim etiladigan qismidan tashqari (bundan yer maydoni, bino va inshootlarning umumiy foydalanishga mo‘ljallangan kommunikatsiya tarmoqlari egallagan qismi mustasno) 20 foizidan oshmagan qismi qonunchilikda taqiqlanmagan tadbirkorlik faoliyati bilan shug‘ullanish uchun mahalliy xususiy sherikka mulk huquqi asosida o‘tkaziladi.
Ushbu loyihani amalga oshirishda manfaatdor tomonlar qiziqish bildirish uchun so’rov va takliflarini 2022-yil 13-iyul Toshkent vaqti bilan soat 18:00 gacha topshirishlari lozim.
Qiziqish bildirish uchun so’rov formasi
Qiziqish bildirish uchun so’rov quyidagi manzillarda qabul qilinadi:
“DXSH to’g’risida”gi qonunning 16-moddasiga binoan, qiziqish bildirish uchun so’rov va tenderlar (takliflar) olingan taqdirda, Oliy ta’lim vazirligi tomonidan loyihaga qiziqish bildirgan talabgorlar ishtirokida xususiy sherikni aniqlash uchun tender o’tkaziladi.
