Xalqaro hamkorlik bo‘yicha prorektor A.Jo‘rayev hamda “Turizm va mehmonxona xo‘jaligi” kafedrasi mudiri N.Ibragimov Bolgariyada xizmat safarida bo‘lib qaytishdi.
26-may kuni Bolgariya poytaxti Sofiya shahriga yetib borgan prorektor A.Jo‘rayev Sofiya universitetiga tashrif buyurdi hamda kun davomida rasmiy uchrashuvlarni o‘tkazdi.
Sofiya universiteti 1888-yilda tashkil etilgan bo‘lib, Bolgariyaning bosh oliy ta’lim muassasi hisoblanadi. Bugungi kunda talabalar soni 22 ming nafarni tashkil etadi. Universitet QS-2023 reytingida 561-570 guruhidan o‘rin olgan.
Dastlabki uchrashuv Sofiya universiteti xalqaro hamkorlik bo‘yicha prorektori Mariya Stoycheva bilan o‘tkazildi. Uchrashuvda o‘zaro hamkorlik masalalarining hozirgi holati hamda istiqbolli rejalar muhokama qilindi. Bolgariya OTMlari ham bugungi kunda O‘zbekiston OTMlarida amalga oshirilayotgan islohotlarga o‘xshash yo‘lni bosib o‘tganligi taʼkidlandi. Xususan, taʼlimda kredit tizimiga o‘tish, moliyaviy va akademik mustaqillik, ilmiy faoliyatni tijoratlashtirish kabi sohalarda Bolgariya Yevropa Ittifoqiga ko‘shilganidan so‘ng katta ishlar olib borilgan bo‘lib, bu sohada Bolgariyaning asosiy universiteti hisoblanuvchi Sofiya universitetining tajribasini o‘rganish mumkin. Tomonlar Sofiya universitetidan 20 nafar professor-o‘qituvchining BuxDUga tashrifini o‘z ichiga oluvchi etno-madaniy ekspeditsiyani tashkil qilishga kelishib olishdi.
Shu kuni prorektor A.Jo‘rayev Sofiya universitetining Mumtoz va yangi filologiya fakulteti dekani prof. M.Danova va prof. V.Dobichina bilan uchrashdi. Uchrashuvda 2 yildan beri muvaffaqiyatli amalga oshirib kelinayotgan “Xorijiy til va adabiyoti (ingliz), OAV” qo‘shma magistratura dasturi bo‘yicha erishilgan natijalar va kelgusi rejalar muhokama qilindi. Xususan, Sofiya universiteti tomoni talabalar uchun bir semestr taʼlim olish, tadqiqotchilar uchun ilmiy stajirovkalar, “Chet tillarini o‘qitish metodikasi”, “Kompyuter lingvistikasi” va boshqa ko‘plab magistratura dasturlarini, “Raqamli muhitda samarali kommunikatsiya”, “Raqamli texnologiyalar va adabiyot taʼlimi” va boshqa yo‘nalishlarda malaka oshirish, “Filologiya” ilmiy jurnallarda maqolalar chop etish taklif qilinmoqda.
Iqtisodiyot va biznes boshqaruvi fakulteti dekani A.Georgiyev bilan uchrashuvda mazkur fakultetning ishlab chiqarish sohasi vakillari bilan hamkorlik o‘rnatish tajribasi bo‘yicha fikr almashildi. Taʼkidlash joizki, mazkur fakultetda banklar, konsalting kompaniyalari, savdo va xizmat ko‘rsatish korxonalari, supermarketlar tarmoqlari bilan yaqin hamkorlik yo‘lga qo‘yilgan. Fakultetdagi ilmiy ishlarning ekonometrik kontenti bo‘lishiga alohida eʼtibor beriladi. Fakultet binosida hamkor kompaniyalar tomonidan jihozlab berilgan xonalar tashkil etilgan bo‘lib, u yerda talabalar bank operetsiyalarini amalga oshirish, birja savdolari o‘tkazish bo‘yicha ko‘nikmalarga ega bo‘lishadi. Fakultetda oyda bir marotaba ilmiy seminarlar tashkil etilib, doktorantlarning ilmiy ishlari muhokama qilinadi, shuningdek yetakchi olimlarning maʼruzalari tinglanadi. Dekan A.Georgiyev bilan BuxDU iqtisodiyot va turizm sohasi tadqiqotchilari va olimlari ham ushbu seminarlarda ishtirok etishlari, dissertatsiyalar muhokama qilinishiga kelishib olindi.
Biologiya fakultetida dekan S.Shishkov va dekan o‘rinbosarlari bilan uchrashuv o‘tkazildi. Mazkur fakultetda “Biotexnologiyalar va ekologiya” magistratura dasturi yetakchilardan hisoblanadi. Fakultetda bir qancha laboratoriyalar mavjud bo‘lib, BuxDU talabalari uchun bir semestr davomida taʼlim olish, ilmiy amaliyotdan o‘tish (14 kun), biotexnologiyalar, virusologiya, ekologiya yo‘nalishlarida ilmiy stajirovkadan o‘tish yoki malaka oshirish kurslarini tashkillashtirish taklif qilinmoqda.
Sofiya universitetidagi uchrashuvlar yakunlanganidan so‘ng, prorektor A.Jo‘rayev Erasmus+ dasturi doirasida BuxDU ishtirokida amalga oshirilayotgan “TALANT – Markaziy Osiyoda inson resurslarini boshqarish magistratura dasturlari” loyihasi ishchi guruhi yig‘ilishida ishtirok etish uchun Burgas shahriga jo‘nab ketdi. Ushbu yig‘ilishda ishtirok etish uchun “Turizm va mehmonxona xo‘jaligi” kafedrasi mudiri N.Ibragimov ham Burgas shahriga yetib bordi.
Taʼkidlash joizki, mazkur loyiha rejasida belgilangan asosiy maqsad – Yevropa Ittifoqining 4 ta universiteti uslubiy ko‘magi yordamida Markaziy Osiyoning 6 ta universitetida “Inson resurslarini boshqarish” magistratura dasturlari tashkil etish muvaffaqiyatli amalga oshirilgan. Shu jumladan, BuxDUda ham ushbu magistratura dasturi yo‘lga qo‘yilgan bo‘lib, unga Rossiya Federatsiyasining Qozon federal universiteti tomonidan ham qiziqish bildirilganligi sababli, dastur qo‘shma magistratura dasturiga aylantirildi.
Prorektor A.Jo‘rayev monitoring komissiyasi aʼzosi sifatida Markaziy Osiyodan hamkor universitetlarda loyihani amalga oshirish holati monitoringi yakunlari bo‘yicha hisobot berib o‘tdi.
2022-yilning sentabr oyi oxirida Buxoro davlat universiteti mezbonligida “Inson resurslarini boshqarishda zamonaviy tendensiyalar” mavzusida xalqaro ilmiy-amaliy seminar o‘tkazilishiga kelishib olindi.
Loyiha yig‘ilishida ishtirok etish bilan bir qatorda prorektor A.Jo‘rayev va kafedra mudiri N.Ibragimov Burgas shahrida faoliyat ko‘rsatuvchi bir qator turizm korxonalari vakillari bilan ham uchrashuvlar o‘tkazishdi. Xususan “Cook’s Club Burgas” mehmonxonasi, “Smart Tour” turizm agentligi vakillari bilan uchrashuvlar chog‘ida BuxDU talabalarining yozgi amaliyotlarini Bolgariya turizm korxonalarida o‘tkazish bo‘yicha kelishuvlarga erishildi. Haq to‘lanuvchi bunday amaliyotlar talabalarning kasbiy mahoratlarini oshirishi orqali ish bilan bandliklarini taʼminlashda ijobiy samara beradi.
Prorektor A.Jo‘rayev va kafedra mudiri N.Ibragimov 2 iyun kuni Buxoro shahriga qaytib kelishdi.
Izoh: Bolgariyaga xizmat safari bilan bog‘liq barcha xarajatlar (yo‘l, mehmonxona, kunlik xarajatlar) TALANT loyihasi hisobidan, A.Jo‘rayevning Sofiya shahridagi xarajatlari (3 kunlik mehmonxona va kunlik xarajatlar) universitetning budjetdan tashqari mablag‘lari hisobidan qoplandi.
