Kechagina BuxDUda “Yilning eng faol talabalar teatr studiyalari” tanlovining birinchi(fakultetlararo) bosqichi yuqori saviyada, ko`tarinki kayfiyatda bo`lib o`tgan edi. Unda 9 ta jamoa “Iqror”, “Farmon bibi”, “Ufq”, “Kelinlar qo‘zg‘oloni”, “Jaydari kelin”, “Uylanish”, “Ot kishnagan oqshom”, “Parvona” kabi sahna asarlarini taqdim etishdi. Ishtirokchilarni Buxoro viloyati musiqali drama teatrining rejissyori G. Husenova, Buxoro viloyati musiqali drama teatri aktyori I. Sodiqov, Yoshlar ishlari agentligi viloyat boshqarmasi 5 tashabbusni muvofiqlashtirish bo‘limi boshlig‘i Sh. Kamolovlar baholab bordilar.
Jamoalar tomonidan taqdim etilgan asarlarda milliy an’analarimiz hamda umumbashariy qadriyatlarimiz tarannum etildi. Jamoalarning badiiy chiqishlari va sahnaviy ko‘rinishlarini o‘ziga xosligi, milliyligi, mazmundorligi, mamlakatimizda amalga oshirilayotgan islohotlar mohiyatining oddiy va xalqchil tarzda ochib berilishiga hakamlar tomonidan e’tirof qaratilgan jamoalar quyidagi nominatsiyalar bo‘yicha taqdirlandi:
“Eng yaxshi spektakl” - Jismoniy madaniyat fakultetining “Buxoriy” jamoasi, Jamol Kamolning “Armon” dostoni sahna ko‘rinishi uchun;
“Dolzarb mavzuning sahnaviy talqini uchun”- Iqtisodiyot va turizm fakultetining “Adolat” jamoasi Said Ahmadning “Ufq” trilogiyasidan sahna ko‘rinishi uchun;
“Milliy an’ana va qadriyatlarni tarannum etnani uchun”- Filologiya fakultetining “Fitrat” jamoasi Tog‘ay Murodning “Ot kishnagan oqshom” asari asosida tayyorlagan sahna ko‘rinishi uchun;
“Eng yaxshi erkak roli uchun”- Iqtisodiyot va turizm fakulteti “Adolat” jamoasi a’zosi 1-kurs talabasi Xasanov Rustam, Said Ahmadning “Ufq” trilogiyasidagi Ikrom roli uchun;
“Eng yaxshi ayol roli uchun” – Jismoniy madaniyat fakulteti “Buxoriy” jamoasi a’zosi Batirova Dilnoza, Jamol Kamolning “Armon” dostonidagi Ona roli uchun;
“Eng yaxshi teatr studiyasi rahbari”- Iqtisodiyot va turizm fakulteti “adolat” talabalar teatr jamoasining badiiy rahbari Narzullaeva Gulchehra Xalilovna taqdirlandilar.
Tanlovda “Eng yaxshi spektakl” nominatsiyasini qo‘lga kiritgan Jismoniy madaniyat fakultetining “Buxoriy” jamoasi tanlovning 2-hududiy bosqichida Buxoro davlat universiteti nomidan ishtirok etish yo‘llanmasini qo‘lga kiritdi.
