Bundan 4 yil ilgari o`z faoliyatini boshlagan “Buxoro Varnet” mas’uliyati cheklangan jamiyati bugungi kunda ko`p tarmoqli klasterga aylangan. Buxoro davlat universiteti rektori Obidjon Xamidov oliy maʼlumotli mutaxassislarni tayyorlash sifatini oshirishda iqtisodiyot sohalari va tarmoqlarining ishtirokini yanada kengaytirish, respublika oliy taʼlim tizimida yuqori malakali raqobatbardosh kadrlar tayyorlashni mamlakatning ijtimoiy-iqtisodiy taraqqiyoti istiqbollari, jamiyat ehtiyojlari, ilm-fan, texnika va texnologiyalarning zamonaviy yutuqlaridan kelib chiqqan holda tubdan takomillashtirish maqsadida "Buxoro Varnet" korxonasi o`rtasida oʻzaro hamkorlik aloqalari boʻyicha shartnoma imzolandi.
Mamlakatimizda yoshlar muammolariga, xususan, ularning ish bilan bandligiga katta e’tibor berilmoqda. Bu vazifani bajarishda barcha oliy ta’lim muassasalari mehnat bozoriga birinchi marta kirib borayotgan yoshlarni ishga joylashtirish masalasini ustuvor vazifalardan biri sifatida qayd etganlar. Buxoro davlat universiteti rektori Obidjon Xamidov boshchiligida universitet rahbariyati, Agronomiya biotexnologiya fakulteti dekani Hafiza Artikova, Issiqxonani boshqarish yo`nalishi talabalari ana shunday ezgu maqsadni ko`zlab “Buxoro Varnet” klasteriga tashrif buyurishdi.
Bugun nafaqat sifatli qishloq xo`jaligi mahsulotlari yetishtirish, balki malakali mutaxassis kadrlarni tarbiyalashni maqsad qilgan klasterda besh bosqichli tizimli ishlar amalga oshirilyapti. Uning 3-bosqichiga asosan malakali va sifatli kadrlarni tayyorlash ko`zda tutilgan. Buxoro davlat universiteti rektori Obidjon Xamidov klaster direktori Beshim Hamroyevga ushbu korxonada faoliyat yuritishlari uchun sifatli kadrlarni yetishtirish maqsadida BuxDU o`qituvchilari, doktorant va magistrlarni Turkiyaga o`qishga yuborish, klaster hududidan Agronomiya va biotexnologiya fakultetining filialini ochish uchun maydon ajratilishi taklifini berdi. Beshim Hamroyev tez kunlarda mavsum boshlanishi munosabati bilan 280 kishilik bo`sh ish o`rni yaratilishini va buning uchun BuxDU talabalari jalb qilinishini ma’lum qildi. Obidjon Xamidov Agronomiya va biotexnologiya fakulteti Tuproqshunoslik kafedrasi, Issiqxonani boshqarish yo`nalishi talabalariga yuzlanib, korxonada iyun oyida saviyali, ilmi bor ishchilarga ehtiyoj borligi, ishga joylashishni istovchi talabalar ushbu imkoniyatdan samarali foydalanishini uqtirdi. Klaster direktori Beshim Hamroyev ko`p sonli talabalarga taqdimot qilishi uchun Agronomiya va biotexnologiya fakultetiga taklif qilindi.
Tuzilgan shartnoma har ikki tomon uchun manfaatli vazifalarni nazarda tutgan. Shartnoma korxonaning mutaxassislar tayyorlash sifatiga boʻlgan talablarini o`rganish uchun stajirovkalar tashkil etish, rivojlangan xorijiy davlatlarning eng ilgʻor tajribasini oʻrgangan hamda mutaxassislarga boʻlgan talabidan kelib chiqqan holda oʻquv rejalari, fan dasturlari, oʻquv adabiyotlari, oʻquv-metodik komplekslarni xalqaro standartlar asosida, zamonaviy, mutlaqo yangi talablar asosida ishlab chiqilishi va bosqichma-bosqich joriy etilishini tashkil qilishni oʻzaro hamkorlikda amalga oshirish, korxonaning muammolarini oʻrganish va ularning yechimi boʻyicha ilmiy hamda amaliy takliflar ishlab chiqish, ilmiy maqolalar tayyorlash va ularni nashr qilish, hamkorlikda seminarlar oʻtkazish, korxonada universitetning tegishli kafedralari filiallarini ochish, korxonada talabalar amaliyotini tashkil etish hamda boʻsh ish oʻrinlariga bitiruvchilarni ishga joylashtirish choralarini koʻrish kabi bir qator qoidalarni o`z ichiga oldi.
Ma’lumot o`rnida aytish joizki, Buxoro viloyatining ko‘p yerlari sho‘rxok va qumloq, suv esa tanqis. Bunday joylarda qishloq xo‘jaligi mahsulotlari yetishtirish uchun gidroponika usuli juda qulay. Shu bois 2018-yil 10-iyuldagi Prezident qarori bilan «Buxoro-agro» erkin iqtisodiy zonasi tashkil etilgan edi. Bu zona uchun Jondor, Kogon, Peshku, Romitan va Buxoro tumanlaridan 3 ming gektar yer ajratildi. To‘g‘ridan-to‘g‘ri investitsiyalar jalb etilib, klaster tizimida qishloq xo‘jaligi mahsulotlari yetishtirish, qayta ishlash va eksport qilish uchun keng sharoit yaratildi. Bugungi kunda ushbu klasterda yangidan-yangi loyihalar ustida ish olib borilmoqda. O`zbekiston-Turkiya hamkorligidagi jamiyat so`nggi to`rt yil ichida o`z ko`lamini 10 barobarga kengaytirdi. Bugungi kelib 30 gektar maydonga zamonaviy issiqxonalar qurilgan bo`lsa, shundan 16 gektari to`la quvvat bilan ishlamoqda. Turkiya Respublikasining yetakchi kompaniyasining 80,2 million yevro mablag`i evaziga qurilayotgan yaxlit kompleksda 400 nafar kishining ish bilan bandligi ta’minlangan. Bir gektardan 300 tonnagacha mahsulot olinayotgan issiqxona to`liq innovatsion texnologiyalar asosida jihozlangan. Issiqxonalarda mutaxassislar tayyorlash uchun o`quv kompleksi va ularning ishlab, amaliyot o`tashi, tajriba orttirishi uchun 72 dona issiqxona mavjud.
Avval bu yerda faqat issiqxona bo‘lgan bo‘lsa, endilikda uning yonida o‘quv markazi, laboratoriya hamda issiqxonalar uchun konstruksiyalar ishlab chiqaruvchi korxona tashkil etilmoqda. Ya’ni zamonaviy issiqxonalar uchun nimaiki kerak bo‘lsa, shu yerda tayyorlanadi. O‘tgan yili qariyb 20 milliard so‘mlik mahsulot yetishtirilib, 1 million dollarlik eksport qilingan. Joriy yilda 26 million dollarlik to‘g‘ridan-to‘g‘ri xorijiy investitsiya jalb qilinishi rejalashtirilgan.
