Mamlakatimizda yoshlar muammolariga, xususan, ularning ish bilan bandligiga katta e’tibor berilmoqda. Bu vazifani bajarishda barcha oliy ta’lim muassasalari mehnat bozoriga birinchi marta kirib borayotgan yoshlarni ishga joylashtirish masalasini ustuvor vazifalardan biri sifatida qayd etganlar.
Ana shu ezgu maqsad natijasi o`laroq, Buxoro davlat universiteti, Buxoro viloyat Mehnat bosh boshqarmasi, Buxoro shahar hokimligi hamda Buxoro shahar Bandlikka ko‘maklashish markazi bilan hamkorlikda "Karyera kuni-2022 mehnat yarmarkasi" bo`lib o`tdi.
Mehnat yarmarkasi mobaynida Buxoro davlat universiteti katta faollar yig`ingohida muassasaning bitiruvchi talabalari uchun ular bandligini ta`minlash maqsadida ochiq muloqot bo`lib o`tdi. Unda BuxDU rektori Obidjon Xamidov, Viloyat Bandlik bosh boshqarmasi boshlig’i Anvar Hamroyev, ayni paytda Germaniyada yashab, faoliyat yuritayotgan BuxDUning sobiq bitiruvchisi, Germaniya tibbiyot muassasalariga ishga jalb qilish loyihasi bo'yicha ish olib borayotgan Nofiza Vohidova hamda Germaniyaning GPScape solution kompaniyasi rahbari janob Shnayder talabalarga kadrlar masalasida bugungi kunning talabi va ishga joylashishdagi asosiy talablar, chet elda o`z sohasi doirasida faoliyat yuritish haqida atroflicha ma’lumot berdilar.
"Karyera kuni-2022 mehnat yarmarkasi" doirasida talabalar va bitiruvchi yoshlar uchun viloyatdagi Xalq ta’limi sohasida 1261 ta, maktabgacha ta’lim sohasida 696 ta, tibbiyot sohasida 839, sanoat sohasida 1435 ta, qurilish sohasida 805 ta, qishloq xo’jaligi sohasida 2032 ta, va boshqa sohalar bilan birgalikda jami 8000 dan ziyod bo`sh ish o`rinlari taklif etildi.
Yarmarkada 100 dan ortiq korxona tashkilotlar jalb qilingan bo’lib, 3500 ga yaqin talabalar ishtirok etishdi. Yarmarka davomida 200 dan ortiq ishga joylashish bo'yicha kelishuvga ega bo'lindi hamda 50 ga yaqin o'zaro hamkorlik aloqalari o'rnatildi.
Ma’lumot o`rnida aytish joizki, Buxoro davlat universitetida joriy yilda bakalavr bosqichida 3299 nafar, magistratura bosqichida 491 nafar, jami 3790 nafar bitiruvchi mavjud.
