Talaba-yoshlarning saylov qonunchiligi bo'yicha huquqiy ongi va madaniyatini oshirish bo'yicha "Yoshlar kelajak uchun ovoz beramiz" shiori ostida o'tkazilayotgan "Targ'ibot poyezdi" loyihasi doirasida Toshkent shahridan yo`lga chiqqan 10 nafar a'zodan iborat targ`ibot guruhi Buxoro viloyatiga tashrif buyurdi. Mehmonlarni Buxoro davlat universiteti rahbariyati kutib oldi.Buxoroga kelgan targ`ibot guruhi avval Buxoro davlat universitetiga tashrif buyurdi. Mehmonlar BuxDU talabalar turar joyiga joylashtirildi. Yoshlarning bo`sh vaqtini mazmunli o`tkazishi hamda kasb-hunar egallashi uchun yaratilgan "Besh tashabbus" xonalari bilan tanishish asnosida mehmonlar hamda targ`ibot guruhi vakili Toshkent Yuridik universiteti professori Muhiddinova Feruza Abdurashidovna talaba-qizlar bilan dildan suhbatlashishdi. Sal fursat o`tib, targ`ibot guruhi Buxoro davlat universitetining Filologiya fakulteti tomon yo`l oldi. Mehmonlar Filologiya fakulteti jamoasi, professor-o'qituvchilari hamda talaba-yoshlari ishtirokida kutib olindi. Ma`ruza uchun ilk so`zni targ`ibot guruhi vakili Toshkent Yuridik universiteti professori Muhiddinova Feruza Abdurashidovna boshlab, loyihaning mazmun-mohiyati xususida gapirdi. Shundan so'ng, guruh a'zosi bo'lgan talabalar o'z yo'nalishlari doirasida chiqishlarni amalga oshirdilar. Saylov qonunchiligi xususida yoshlar bilishi kerak bo`lgan masalalar xususida to`xtaldilar. Tadbir davomida talaba-yoshlar Saylov qonunchiligiga oid o`zlarini qiziqtirgan savollar bilan murojaat qildilar. Tinglovchilar qo`yilgan masalani yana-da teranroq anglashlari uchun targ`ibotchi talabalar tomonidan viktorina tashkil etildi.Erta tongdan targ'ibotchilar universitetda tashkil etilgan zamonaviy Axborot resurs markazi, IT markaz faoliyati, “Islohotlar xalq uchun” targ`ibot markazi faoliyati bilan tanishdilar. Shundan so`ng BuxDUning “Islohotlar — xalq uchun” targ‘ibot markazida universitet rektori O.X.Xamidov boshchiligida davra suhbati bo`lib o`tdi. Unda BuxDU rahbariyati, fakultet dekanlari, bo`lim boshliqlari ishtirok etishdi.“Azaldan ilm-ma’rifat o`chog`i bo`lgan, ko`plab oliy ta’lim muassasalariga beshik avliyolar yurtiga, Buxoroyi sharifga xush kelibsiz. Mamlakatimizda bo‘lib o‘tadigan muhim siyosiy jarayon – O‘zbekiston Prezidenti saylovi munosabati bilan qilgan tashrifingiz kelajakda siz tahsil olayotgan OTMlar bilan talabalar almashinuviga ulanib ketsin. Bizning har bir faoliyatimiz zamirida xalqimizning ilm salohiyatini yuksaltirish, munosib sharoitlarda yashashlari uchun hissa qo`shishdan iborat. Ushbu samimiy tilagimiz ro`yobi esa bevosita kutilayotgan siyosiy tadbir mamlakat va fuqarolar hayotida, ertangi kunimizning barqaror rivojlanishida o‘ta dolzarb ahamiyat kasb etayotgan saylov jarayoniga bog`liq. Bu galgi saylov jarayoni har safargidan qizg`in, yurtimizda bo‘lib turgan xalqaro tashkilotlar vakillari hamda xalqaro kuzatuvchilar ham buni e’tirof etishmoqda, “- dedi BuxDU rektori mehmonlarga yuzlanib.“So`nggi yillarda olib borilayotgan islohotlarning Har biri umumxalq manfaatiga, ularga yengillik va qulayliklar yaratishga xizmat qilayotgani bilan ahamiyatli. Buxorodagi muhit, ilm-ma’rifat, fozillik, yaratilayotgan shart-sharoitlar islohotlar xalq uchun ekanligining amaliy ifodasidir. Men ham yonimda 9 nafar qanotim bilan yo`lga chiqar ekanman, kutilayotgan siyosiy tadbir, O`zbekiston Respublikasi Prezidenti sayloviga munosib hissa qo`shish uchun borayotganimdan mamnuniyat sezdim,” – dedi targ`ibot guruhi vakili Toshkent Yuridik universiteti professori Muhiddinova Feruza Abdurashidovna.Targ`ibot guruhining navbatdagi manzili Buxoro davlat universitetining Agronomiya va biotexnologiya fakulteti hamda Harbiy ta’lim fakultetlari bo`ldi. Fakultetlarning professor-o`qituvchilari, talabalar ularni qizg`in kutib olishdi.“Yangi O`zbekistonning al-Xorazmiysi, ibn Sinosi, Abu Nasr Farobiysi bizmiz. Xo`sh, bu natijaga qanday erishish mumkin, deysizmi?! Albatta, O`zbekistonda bo`lgan siyosiy jarayonlarga befarq bo`lmay, o`z fuqarolik pozitsiyamizda sobit turib, yurtimiz hayotida sodir bo`layotgan har bir siyosiy voqea-hodisaga e’tibor berish orqali erishamiz. Mamlakatimiz istiqboli uchun, ertamiz uchun, farovon hayot uchun birgalikda ovoz beramiz,” – deya talabalarga yuzlandi targ`ibot guruhi a’zosi. Faollar yig`ingohida bo`lgan, ochiq muloqot tarzidagi tadbirlar savol-javoblarga boy o`tdi. Ma’lumot o`rnida aytish joizki, ushbu targ`ibot guruhi O`zbekistonning buguni hamda ertasi bo`lgan yoshlar o'rtasida huquqiy ong va huquqiy madaniyatni oshirish, mamlakatimizda o'tkaziladigan siyosiy jarayonlarda yoshlarning faol ishtirok etishlarini targ' ib qilish, vatanimiz kelajagi va ravnaqi yo'lida amalga oshirilayotgan islohotlarning mazmun-mohiyatini yetkazish, ularning intellektual va ma'naviy yetuk etib tarbiyalash hamda barqaror siyosiy taraqqiyotning drayveriga aylantirish yo`lida ijtimoiy faolliklarini oshirish, yoshlar jamoat tashkilotlari va volontyorlik harakatlarini qo'llab-quvvatlashni o`z oldiga muhim vazifa etib belgilagan. Yoshlarning shaxsiy rivojlanishi va huquqiy madaniyatini oshirish, ularda faol fuqarolik pozitsiyasi shakllangan holda mamlakatda amalga oshirilayotgan islohotlarga nisbatan daxldorlik hissini orttirishga xizmat qilayotgan bu kabi targ`ibotlar kutilgandan-da ortiq natija berishiga shubha yo`q. BuxDU Matbuot xizmati