Ayni kunlarda O‘zbekiston Respublikasi Bosh vaziri o‘rinbosarining 2021-yil 21-sentyabrdagi 51-sonli bayoni ijrosini ta’minlash, oliy ta’lim muassasalarida saylov jarayoniga puxta va yuqori saviyada tayyorgarlik ko‘rish, professor-o‘qituvchilar va talaba yoshlarning mazkur siyosiy tadbirda faol ishtirok etishi bilan bog‘liq keng ko‘lamli targ‘ibot-tashviqot tadbirlari o‘tkazilmoqda. Bugun Buxoro davlat universiteti bosh yig`ingohida mazkur tadbirlar davomi sifatida Buxoro viloyatidagi oliy ta’lim muassasalari bilan hamkorlikda “Talaba-yoshlar va saylov” tadbiri bo`lib o`tdi. Tadbirni BuxDU rektori O.X.Xamidov kirish so`zi bilan ochib berdi. Milliy g‘oya, ma’naviyat asoslari va huquq ta’limi kafedrasi mudiri, dotsent Feruz Muzaffarov tomonidan yig`ilganlarga Saylov kodeksi hamda saylov qonunchiligi xususida batafsil ma’lumot berildi. Shundan so`ng, Buxoro shahri 20-USK komissiyasi raisi Umid Sobirovning “Saylov uchastkasida ovoz berishning tartibi va o‘ziga xosligi” hamda Tarix va madaniy meros fakulteti dekani Jamshid Jo‘rayevning “Saylov tizimi va prinsiplari” nomli ma’ruzalari tinglandi. Tinglovchilarga batafsil ma’lumot berish maqsadida ekranda muddatdan oldin ovoz berish, Pandemiya sharoitida ovoz berish tartibi xususida videoroliklar hamda Yoshlar ittifoqi BT tomonidan tashkillashtirilgan #Келажак uchun ovoz ber! xeshtegi namoyish etildi. Tadbir so`nggida tanlovlarda g‘oliblikni qo‘lga kiritgan yoshlar rag‘batlantirildi.BuxDU Matbuot xizmati