Bugun 18-avgust kuni Buxoro davlat universitetida bitiruvchi magistrlarga diplom topshirish marosimi bo`lib o`tdi. Har o‘quv yili yakunida bayramona, ko`tarinki kayfiyatda o`tkaziladigan ushbu marosim joriy yilda yanada o`zgacha ruh va kayfiyatda o`tdi. Qadrli magistrlarga diplom topshirish va ularni kelajak sari mustaqil hayotga kuzatish marosimiga barcha jam bo‘ldi. Ushbu marosimga hurmatli mehmonlar, xususan, Buxoro viloyati hokimining yoshlar siyosati, ijtimoiy rivojlantirish va ma’naviy-ma’rifiy ishlar bo‘yicha o‘rinbosari M. M. Xamrayev, Oliy Majlis senati a’zosi A.A.Xuseynova, Oliy ta’lim vazirligidan tashrif buyurgan mehmonlar, universitet rahbariyati, ustozlar va ota-onalar ishtirok etishdi.Marosim avvalida BuxDU rektori O.X.Xamidov so`zga chiqib, 248 nafar bitiruvchiga samimiy dil izhorlarini yo`lladi: “ Har yilgi an’anaga muvofiq bugun ham magistrlarimizni mustaqil ilm yo`liga kuzatish uchun yig`ildik. Bizning bosh vazifamiz Yangi O`zbekistonda yangi Al-Farg`oniylar, Al-Xorazmiylar, ibn Sinolar, Beruniylar, Mirzo Ulug`beklar, Navoiylarni tarbiyalab yetkazish, nafaqat vazifamiz, balki, ta’lim oldidagi muqaddas burchimizdir. Bugungi kun nafaqat siz – aziz bitiruvchilarimiz, balki biz — ota-onalar, ustozlar uchun ham g‘oyat quvonchli va hayajonli voqeadir. Chunki, ilmning mashaqqatli pillapoyasining ikkinchi pag`onasini zabt etgan siz – azm-u shijoatli yoshlarimiz timsolida sa’y-harakatlarimizning yana bir amaliy natijasini, xalqimiz va Vatanimizning kelajagini ko‘ramiz. Universitetda ko‘p yillik ta’lim-tarbiya jarayonidagi mehnatingiz tufayli ustozlar tomonidan berilgan baho orqali magistrlik darajasiga erishdingiz. Olgan bilim va ko‘nikmalaringiz hayotda o‘z o‘rningizni egallashingizda asos bo‘lib xizmat qiladi, deb o‘ylayman. Ushbu vazifalarning bajarilishiga kirishar ekansiz, sohamizni yanada rivojlantirishga qaratilgan ishlarni davom ettirar ekansiz, Sizlardan ushbu oliy o‘quv yurtida olgan barcha bilimlaringizni, kuch-g‘ayratingizni ishga solishingiz va eng muhimi, ishga mas’uliyat, vazifalarga fidoyilik bilan yondashishingizni istab qolaman.”Shundan so`ng, Buxoro viloyati hokimining yoshlar siyosati, ijtimoiy rivojlantirish va ma’naviy-ma’rifiy ishlar bo‘yicha o‘rinbosari M. M. Xamrayev so`zga chiqib, Buxoro viloyat hokimi B. K. Zaripovning bitiruvchilarga yo`llagan tabrigini o`qib berdi. Farzandining muvaffaqiyatidan quvonib, ilm dargohining ilmiy salohiyati, OTMlar ichidagi nufuzi xususida gapira turib, “Boshlang`ich ta’lim” yo`nalishida tahsil olgan qizi qatorida barcha magistrlarni she’riy qutlagan ona – L.F. Sharipovaning chiqishi yig`ilganlarning hayajonli olqishiga sazovor bo`ldi:“Buxoro davlat universiteti nafaqat meni, balki, uch nafar farzandimni ham o`z bag`rida ilm chashmasidan bahramand qilgani uchun ham faxrlanaman. Qutlug` koshonada pedagog ekanligimdan hamisha iftixor tuyaman. Respublika miqyosida xalq xizmatida yurgan ko`plab fidoyilarga oq yo`l tilagan ushbu maskan sizni ham ilm ummoniga kuzatar ekan, muvaffaqiyatingizga ishonib, kamolotingizga intiqib, oq fotiha beradi. O`ylaymanki, bunga munosib voris bo`lasiz.” Monitorda ushbu qutlug` dargohning sobiq bitiruvchilari tayyorlagan videoroliklar magistrlar uchun kutilmagan tabriknoma bo`ldi, desak also mubolag`a bo`lmaydi.Marosimning asosiy qismida har bir yo`nalish sahnaga taklif qilinib, Buxoro viloyati hokimining yoshlar siyosati, ijtimoiy rivojlantirish va ma’naviy-ma’rifiy ishlar bo‘yicha o‘rinbosari M.M. Xamrayev hamda BuxDU rektori O. X. Xamidov, marosimga uzoq-yaqindan taklif qilingan mehmonlar, fakultet dekanlari boshchiligida diplomlar hamda gullar topshirildi. Marosim yakunida bitiruvchi magistrantlar ushbu qutlug` sanani birgalikda suratlarga muhrladilar. BuxDU Matbuot xizmati