HURMATLI HAMKASBLAR, QADRLI USTOZLAR VA AZIZ VATANDOSHLAR!Sizlarni, yurtimizdagi barcha moʼmin-musulmonlarni, butun xalqimizni mehr-oqibat, ezgulik va saxovat ayyomi – muborak Ramazon hayiti bilan chin qalbimdan samimiy tabriklayman.Bu qutlugʼ bayramda hammamiz avvalo shunday fayzli va barokatli kunlarga yetkazgani uchun Yaratganga cheksiz shukronalar aytamiz. Oila, mahalla va jamiyat ahliga mehr va eʼtibor koʼrsatish, koʼmakka muhtoj, ehtiyojmand kishilarga begʼaraz yordam berish, yaxshilik, sabru qanoat kabi ezgu fazilatlarni oʼzida mujassam etgan bu bayramning maʼno-mazmuni bugungi kunda Oʼzbekistonda olib borilayotgan siyosatga gʼoyat uygʼun va hamohang ekanini, oʼylaymanki, shu saodatli damlarda har birimiz chuqur his etmoqdamiz.Shu ulugʼ ayyom kunlarida uzoq va yaqin musulmon mamlakatlarning xalqlarini, barcha doʼstlarimizni samimiy qutlab, ularga tinchlik, taraqqiyot va farovonlik tilashdan behad mamnunmiz. Muborak hadislarda aytilganidek, ikki dunyo saodatini oʼylab yashagan inson, xalq hech qachon kam boʼlmaydi.Barchangizni muqaddas Ramazon hayiti bilan yana bir bor tabriklayman. El-yurtimizning shu muborak oyda qilgan ibodatlari, ezgu niyatlari ijobat boʼlsin! Jonajon Vatanimiz, xonadonlarimizda tinchlik, ahillik, fayzu baraka bardavom boʼlsin!Ezgu ishlarimiz, intilishlarimizda Yaratganning Oʼzi madadkor boʼlsin!Buxoro davlat universiteti rektori Obidjon Xamidov
