Turli mamlakatlar OTMlarida o‘tkazilayotgan xalqaro konferensiyalar va tadbirlarda ishtirok etish universitetimizning xalqaro taʼlim muhitida tanilishiga hissa qo‘shadi. Shu sababli, bunday tadbirlarda universitetimizning turli sohalardagi tajribasi to‘g‘risida maʼlumotlar berib borish muhim ahamiyat kasb etadi.Xalqaro hamkorlik bo‘yicha prorektor A.Jo‘rayev 30 mart kuni Yevroosiyo milliy universiteti (Qozog‘iston), Saratov davlat yuridik akademiyasi, “Yevroosiyo-Volga bo‘yi” informatsion-tahlil markazi hamda Saratov davlat universiteti huzuridagi MDH va Boltiqbo‘yi mamlakatlari bilan hamkorlik ilmiy-taʼlim markazi tomonidan tashkil etilgan “Pandemiya sharoitida universitetlararo xalqaro aloqalarni saqlab qolish va onlayn taʼlim xizmatlari eksporti istiqbollari” mavzusidagi xalqaro ekspertlar yig‘ilishida ishtirok etdi.Ekspertlar yig‘ilishida A.Jo‘rayev tomonidan pandemiya davrida Buxoro davlat universitetida taʼlim jarayonlarini tashkil qilish, xalqaro hamkorlik masalalarini yo‘lga qo‘yish tajribasi to‘g‘risida maʼlumot berildi. Xususan, xorijning yetakchi universitetlaridan professor-o‘qituvchilarni onlayn ravishda dars berishlari uchun taklif qilish tajribasi boshqa ishtirokchilarda katta qiziqish uyg‘otdi.Shu kunning o‘zida prorektor A.Jo‘rayev Erasmus+ dasturining ALLVET loyihasi doirasida Qozog‘istonning Narxoz universitetida tashkil etilgan “ALLVET loyihasi: Bolonya jarayonlarini qo‘llash hamda texnik va professional taʼlim tizimida oliy va kasbiy taʼlimning samarali integratsiyasini taʼminlash” xalqaro konferensiyasida taklif etilgan spiker sifatida ishtirok etdi. A.Jo‘rayev O‘zbekistonda oliy va professional taʼlim tizimi, shuningdek Buxoro davlat universiteti haqida umumiy maʼlumotlarni taqdim etdi. Konferensiya so‘ngida bir nechta xorijiy ishtirokchilardan universitetimiz bilan hamkorlik o‘rnatish takliflari kelib tushdi.BuxDU Xalqaro hamkorlik bo'limi
