Xabaringiz bor bugungi kunda butun dunyo hamjamiyatini, jumladan, Oʼzbekiston xalqini tashvishga solayotgan koronovirus pandemiyasining tarqalishi Respublikamizda karantin deb eʼlon qilinishiga sabab boʼldi. Аyniqsa, Oʼzbekiston Respublikasi Prezidentining 2020 yil 19 martdagi “Koronavirus pandemiyasi va global inqiroz holatlarining iqtisodiyot tarmoqlariga salbiy taʼsirini yumshatish boʼyicha birinchi navbatdagi chora-tadbirlar toʼgʼrisidagi” PF-5969 – son farmoni va Oʼzbekiston Respublikasi Vazirlar Mahkamasining 2020 yil 23 martdagi “Koronavirus infektsiyasi tarqalishiga qarshi qoʼshimcha chora-tadbirlar toʼgʼrisidagi” 176-son qarori ijrosining taʼminlanishi barcha sohalar kabi Oliy taʼlim muassasalarining barcha professor-oʼqituvchilari oldiga ham qator vazifalarni qoʼydi. Shundan kelib chiqib universitetimizning Psixologiya kafedrasi olimlari tomonidan ham muayyan ishlar amalga oshirildi. Jumladan, kafedra oʼqituvchilari tomonidan televideniya va universitet saytlari orqali bir qator psixologik maslahat va tavsiyalar berib borilmoqda, viloyat “Oila ilmiy-amaliy tadqiqot” markazi bilan hamkorlikda aholining turli qatlamlariga va ayniqsa yoshlar bilan onlayn tizimi orqali psixologik muloqotlar tashkil etildi. Kafedra huzuridagi “Psixologik xizmat” markazi tomonidan viloyatda faoliyat koʼrsatayotgan amaliyotchi psixologlar uchun aholining turli qatlamlarini oʼrganish va tegishli psixologik tavsiyalar bera olishga moʼljallangan metodikalar ishlab chiqildi va karantin davrida yaratilgan ushbu metodikalarga Oʼzbekiston Respublikasi Аdliya vazirligi huzuridagi intellektual mulk agentligi tomonidan mualliflik guvohnomalari berildi. Аlbatta, bugun davlatimiz va aholining barcha qatlamlari, jumladan, yoshlar, oilalar, nogironlar, keksalar va turli ijtimoiy guruhlarga mansub shaxslar – psixologlardan oʼzlari uchun kerakli boʼlgan maslahatlarni, amaliy tavsiyalarni kutmoqda.2020-yilning 4-may kuni Buxoro davlat universitetida Zoom platformasi orqali Xorijiy olimlar ishtirokida "Karantin davrida aholining turli qatlamlariga psixologik xizmat ko'rsatishning o'ziga xos xususiyatlari" mavzusida on-line webinar tashkil etildi. Ushbu onlayn muloqotda Rossiyaning yirik psixolog-olimlari – Vladimir Vasilyevich Kozlov, Sergey Borisevich Malix, Oʼzbekistonlik olimlardan Gʼayrat Baxromovich Shoumarov, Zarifboy Rajabovich Ibodullaev, Baxriddin Mingboevich Umarov, Qarshi davlat universiteti olimlari hamda Buxoro davlat universiteti psixologiya kafedrasi oʼqituvchilari, magistrlari va talabalari ishtirok etishdi. Ushbu onlayn – muloqotda koʼtarilgan masalalar, bildiriladigan ilmiy mulohazalar va tavsiyalar mazkur karantin davrida aholining barcha qatlamlarinini qiynab kelayotgan psixologik inqirozlarni bartaraf etishda muhim ahamiyat kasb etadi.BuxDU matbuot xizmati
