Hurmatli talabalar va ota-onalar!Fransiyaning VATEL mehmonxona va turizm biznes maktabi hamda Buxoro davlat universiteti hamkorligidagi “Xalqaro mehmonxona menejmenti” qo‘shma bakalavriat taʼlim dasturi 1-kursi yakunlari bo‘yicha quyidagilar maʼlum qilinadi.O‘quv yili davomida talabalarga 44 kredit (1226 soat) “Ingliz tili” hamda 4 kredit (100 soat) “O‘zbekiston tarixi” fanlari, jami 48 kredit hajmida dars soatlari o‘tildi.“O‘zbekiston tarixi” fanidan talabalar test sinovlarini bajarganliklari hamda darslarda ishtirok etganlaridan kelib chiqqan holda baholandilar.2-kursga o‘tish uchun eng asosiy ko‘rsatkich bo‘lib ingliz tilidan yuqori darajadagi bilim va ko‘nikmalar hisoblanadi. 2-kursdan boshlab, ixtisoslik bo‘yicha taʼlim to‘liq ingliz tilida bo‘lishi, Vatel biznes maktabining jahondagi barcha filial va dasturlari bilan bir xil o‘quv rejada dars o‘tilishi, filiallar o‘rtasida xalqaro almashinuvni yo‘lga qo‘yish belgilangan. Shu sababli, 2-kursda taʼlimni davom ettirish uchun IELTS testidan kamida 6,0 ball to‘plash lozim.Buxoro davlat universitetida karantin davridagi muammolarni inobatga olib, talabalar manfaatlarini ko‘zlab, Vatel biznes maktabi bilan kelishgan holda, odatiy IELTS testi (1,5 mln. so‘m, Toshkent shahrida topshiriladi, test xarajati talabalar hisobidan) o‘rniga uning yengilroq ko‘rinishi bo‘lgan IELTS Mock testini topshirtirish, minimal talabni 5,5 ball qilib belgilash, test xarajatlarini universitet tomonidan qoplash bo‘yicha qaror qabul qilindi.8-9-iyul kunlari Britaniya Kengashining Buxorodagi hamkori bo‘lgan The Knowledge Academy, Vatel biznes maktabi akademik direktori Benjamin Garsiya, xalqaro rivojlanish bo‘yicha menejer Alin Renar-Vang hamda BuxDUdan belgilangan masʼul o‘qituvchilar ishtirokida sinovlar o‘tkazildi.Sinov natijalariga ko‘ra quyidagi qarorlar qabul qilindi:1) Karantin davridagi muayyan qiyinchiliklarni inobatga olgan holda, 2-kursga o‘tish uchun minimal talab 5,0 ball qilib belgilandi hamda 46 nafar talaba 2-kursga o‘tish uchun tavsiya etildi. 1-kurs uchun shartnoma to‘lovlarini to‘liq to‘lagan talabalarni 2-kursga o‘tkazish bo‘yicha buyruq rasmiylashtiriladi hamda ro‘yxat Vatel biznes maktabiga taqdim etiladi.2) Sinovlardan 5,0 balldan kam to‘plagan 23 nafar talabaga shartnoma to‘lovlaridan qarzlarni to‘liq qoplash sharti bilan 1-kursni tugallaganligi haqida sertifikat hamda erishgan natijalari ko‘rsatilgan qaydnoma rasmiylashtirib beriladi. Ushbu talabalar ingliz tili bilimlarini oshirib, IELTS, TOEFL yoki CEFR ko‘rsatkichlari yetarli ekanligini tasdiqlovchi hujjatni qo‘lga kiritib, 2021 yilgi qabul jarayonlarida murojaat qilsalar, 2021-2022 o‘quv yilida 2-kursga tiklanishlari mumkin. Buning uchun BuxDU tomonidan beriladigan sertifikat va qaydnoma asos bo‘ladi. Shartnoma to‘lovlarini to‘liq to‘lamagan talabalar uchun ushbu hujjatlar rasmiylashtirilmaydi.3) “Qizil zona”da yashaganliklari yoki kasalliklari sababli sinovlarga kela olmagan, shuningdek sinovning faqat suhbat qismini topshirgan 17 nafar talabaga joriy yilning 10-avgust kuniga qadar The Knowledge Academy markazida, karantin qoidalariga to‘liq rioya qilgan holda sinovlarni topshirish tavsiya etiladi. Sinov xarajatlari BuxDU tomonidan to‘g‘ridan to‘g‘ri The Knowledge Academy markaziga qoplab beriladi. Sinov natijalariga ko‘ra,12-avgustga qadar talabalarni 2-kursga ko‘chirib-ko‘chirmaslik masalasi ko‘rib chiqiladi. Ushbu talabalarga ham shartnoma to‘lovlaridan qarzlarni to‘liq qoplash sharti bilan 1-kursni tugallaganligi haqida sertifikat hamda erishgan natijalari ko‘rsatilgan qaydnoma rasmiylashtirib beriladi.BuxDU Matbuot xizmati
