Oʼzbekiston Respublikasi Prezidentining 2019-yil 8-oktabrdagi “Oʼzbekiston Respublikasi oliy taʼlim tizimini 2030 yilgacha rivojlantirish konseptsiyasini tasdiqlash toʼgʼrisida”gi PF-5847-son Farmonida oliy taʼlim muassasalarining oʼquv rejalarini kredit-modul tizimiga oʼtkazish mexanizmlarini ishlab chiqish va ularni bosqichma-bosqich mazkur tizimga oʼtkazish masalalari vazifa qilib qoʼyilgan.Bu borada Toshkent axborot texnologiyalari universiteti yetakchi oliy taʼlim muassasalaridan biri hisoblanadi. Kelgusida Buxoro davlat universitetida ham oʼquv jarayonini bosqichma-bosqich kredit-modul tizimiga oʼtkazish boʼyicha tajriba ulashish maqsadida TАTU Taʼlimning kredit tizimini boshqarish boʼlimi boshligʼi Аlisherov Farhod Аlisherovich hamda Xurshid Jiyanbekovlar 2019-yil 12-dekabr kuni Buxoro davlat universitetiga tashrif buyurishdi. Tashrif davomida TАTU da samarali faoliyat yuritayotgan kredit-modul tizimi va uning afzallik tomonlari. Universitetda kredit-modul tizimini joriy qilish masalasi yuzasidan seminar-trening tashkil qilindi. Seminar-trening 2 bosqichda tashkil qilindi. Kunning 1- yarmida oʼquv boʼlimi, taʼlim sifatini nazorat qilish boʼlimi, axborot texnologiyalari markazi boʼlimi, reja-moliya boʼlimi, universitetda faoliyat yuritayotgan oʼquv jarayonini qoʼllab-quvvatlash (elektron qaydnoma) tizimini yuritayotgan administratorlari va axborot texnologiyalari kafedrasi yetakchi professor-oʼqituvchilari ishtirokida seminar tashkil qilindi. Kunning 2- yarmida esa universitet kichik faollar zalida prorektorlar, fakultet rahbarlari va kafedra mudirlari ishtirokida kengaytirilgan seminar boʼlib oʼtdi. Mazkur seminar davomida ishtirokchilar koʼplab oʼzlarini qiziqtirgan savollarga javob oldilar. Mazkur seminar-trening oʼquv boʼlimi tomonidan tashkil qilindi. Buxoro davlat universiteti Matbuot kotibi Otabek Jalolov