“Talabalar tomonidan dorilarning narkotik modda sifatida iste’mol qilinishini oldini olish choralarini ko‘rish" Giyohvandlikka qarshi kurashish bugungi kunga kelib davlat miqyosidagi o‘ta dolzarb va muhim masala. O‘zbekiston Respublikasi mustaqillikka erishganidan keyingi yillarda giyohvandlikni oldini olish, psixatrop vositalar oldi-sotdisini bartaraf etish borasida samarali ishlar amalga oshirilib kelinmoqda.Giyohvandlik kabi xavf-xatarni bartaraf etish maqsadida keng jamoatchilikning faolligiga tayanilayotganini alohida e’tirof etish zarur. Ayniqsa, hozirda ushbu illatga qarshi kurash chora-tadbirlari bir necha bor kuchaytirildi. Shuni aniq aytib bilamizki, bugun barcha illatlarga qarshi ayovsiz kurash ketayotganda jazolashni asosiy chora deb qaramasdan, profilaktika, ya’ni illatlarning oldini olishga ko‘proq e’tibor bermog‘imiz zarur. Ana shunday tadbirlardan biri 4 noyabr kuni Buxoro davlat universitetining faollar zalida “Talabalar tomonidan dorilarning narkotik modda sifatida iste’mol qilinishini oldini olish choralarini ko‘rish” mavzusida tadbir bo‘lib o‘tdi. Tadbirda O‘zbekiston Respublikasi Vazirlar Mahkamasi huzuridagi Narkotik moddalarni nazorat qilish Milliy markazi bo‘lim boshlig‘i Sh.G‘ulomov, Markazning yetakchi eksperti Sh.Arapov, Viloyat narkologiya dispanseri I.Toshev, BuxDU “Ibn Sino salomatlik maskani” ma’rifat markazi rahbari G.Muratova ishtirok etdilar. Barcha ishtirokchilar asosiy bir mazmundagi mavzuda “Giyohvandlik ham umrning, ham asrimizning vabosi. Giyohvandlikka odatda, ruhan zaif, irodasi bo‘sh, birovlarga taqlid qilishga moyil, o‘ta xudbin kishilar beriluvchan bo‘ladi. Bunday shaxslar o‘z moyilliklariga qarshi kurasha olmaydilar. Yoshlar tarbiyasi sohasidagi muammolarni qanchalik tez hal qila olsak, bu illatga qarshi samarali kurasha olamiz. Buning uchun har bir kishida ijtimoiy burch tuyg‘usini tarbiyalash kerak” hamfikr bo‘ldilar. Shuningdek, soha mutaxassislari tomonidan bugungi kunda “dorixona giyohvandligi”ning avj olib borishi, shifokor retseptisiz sarxushliklarga olib keltiruvchi turli dori vositalarini yoshlar tomonidan iste’mol qilinishi borasida qizg‘in suhbat olib borildi. Shu o‘rinda bir fikr tug‘iladi, oramizda giyohvandlikka qarshi kurash huquqni muhofaza qilish organlarining vazifasi deb o‘ylaydiganlar juda ko‘p. Davlatimiz tomonidan giyohvandlikka qarshi kurashishga oid vazifalar keyinchalik ham ushbu organlar tomonidan bajarilishi shubhasiz. Jamiyatimizning barchasi kim bo‘lishidan qat’iy nazar “farzandim giyohvand moddalar iste’mol qilmaydi, bu vabo menga va mening yaqinlarimga xavf sola olmaydi” deb o‘ylasa, katta xato qiladi. Chunki farzandlarimiz har qancha yaxshi tarbiyalanmasin, yetuk bo‘lmasin shu illatga chalinganlar uni ham giyohvandlik domiga tortishi hech gap emas. Giyohvandlik kabi zalolatga tortuvchi ushbu illat uchun doimo farzandlarimizni ogohlantirib turishimiz, ularning qiziqishlarini hisobga olgan holda ular bilan muomala qilishimiz o‘z farzandlarimizning kelajak va taqdirlariga befarq bo‘lmasligimiz lozimdir. Yoshlar bilan ishlash, ma`naviyat va ma`rifat bo`limi uslubshunosi Sh.Radjabova