Prezidentimiz Shavkat Mirziyoev xalqimiz azaldan yuksak qadrlab keladigan, hamma narsadan ustun qoʼyadigan adolat tuygʼusini hayotimizda yanada keng qaror toptirish birinchi darajali vazifa ekaniga alohida eʼtibor qaratmoqda.Oʼzbekiston Respublikasi Prezidentining 2019 yil 27 maydagi “Oʼzbekiston Respublikasida korruptsiyaga qarshi kurashish tizimini yanada takomillashtirish chora-tadbirlari toʼgʼrisida”gi PF-5729-sonli Farmoni bunga yaqqol misol boʼla oladi. Jamiyatimizda korruptsiya, turli jinoyatlarni sodir etish va boshqa huquqbuzarlik holatlariga qarshi kurashish, ularga yoʼl qoʼymaslik, jinoyatga jazo albatta muqarrar ekani toʼgʼrisidagi qonun talablarini amalda taʼminlash boʼyicha qatʼiy choralar koʼrish zarurligi taʼkidlanmoqda. Jamiyatda korruptsiyaga nisbatan murosasiz munosabat qaror toptirish oʼta dolzarb masala boʼlib, garchi uni bajarish doirasida masʼul idoralar belgilangan boʼlsa-da, uning toʼlaqonli roʼyobga chiqishi uchun har bir fuqaro oʼzida masʼuliyat his etsa, qoʼyilgan maqsad va muddaolar yechimi paydo boʼladi. Har birimiz qaerda, qanday muammoga duch kelsak, uning hal etilishida masʼul shaxslarning masʼuliyatsizligi yoki taʼmagirligiga guvoh boʼlganda sharoitga boʼysunish, indamay ketaverish yoxud chidash oʼrniga bong urishimiz kerak. Masʼuliyatsizlikka, adolatsizlikka nisbatan murosasizlikni oʼzimizdan boshlashimiz darkor. Shunda mudrayotgan mansabdor uygʼonadi, zimmasida qanday masʼuliyat borligini his etadi.Buxoro davlat universitetida “Korruptsiyaga qarshi kurash” mavzusidagi tadbirlar, uchrashuvlar, davra suhbatlari Viloyat prokuraturasi, IIB, Viloyat imom xatibi hamkorligida tashkil etildi. Аsosiy maqsad tadbirlar orqali talaba-yoshlar ongiga atrofimizda sodir boʼlayotgan voqea-hodisalarga befarq boʼlmasligimiz, xalqimizning adolat qaror topgan jamiyatda yashashi uchun nafaqat masʼul shaxslar, balki har bir fuqaro oʼz hissasini qoʼshishi zarurligini singdirish. Chunki har qanday qonunbuzarliklar sodir etilishiga, koʼpayishiga koʼp hollarda oʼzimizning befarqligimiz, loqaydligimiz sabab boʼlib kelmoqda. Bugungi kunda talabalarimiz korruptsiya toʼgʼrisida oʼz fikr-mulohazalaridan kelib chiqqan holda hayotiy, real voqealarga asoslangan sahna koʼrinishlari, mavzuga doir plakat chizishlari fikrimiz dalilidir. “Yoshlar Vatan xizmatida rostgoʼylik va qonunlarni hurmat qilish tarafdori” mavzusida ijodiy ishlar tanlovi universitet bosqichining “Eng yaxshi plakat”, “Eng yaxshi bayon” nominatsiyasi gʼoliblari tadbirda faxriy yorliqlar bilan taqdirlandilar. Faol ishtirok etgan universitet talabalariga tashakkurnomalar taqdim etildi. Bunday uchrashuvlar fuqarolarimizda korruptsiyaga, aniqroq aytganda, har qanday qonunbuzarlikka nisbatan murosasizlik kayfiyati, madaniyati shakllanishiga olib keladi. Barchaning yakdilligi, yurt taqdiriga daxldorligi kuchayishi har qanday illatning batamom barham topishiga xizmat qiladi.Buxoro davlat universitetiYoshlar bilan ishlash boʼyicha prorektoriА.M. Kadirov
