Oʼzbekiston Respublikasi Prezidentining “Iqtidorli yoshlarni aniqlash va yuqori malakali kadrlarni tayyorlashning uzluksiz tizimini tashkil etish chora-tadbirlari toʼgʼrisida”gi 2019 yil 3 maydagi PQ-4306 sonli qaroriga asosan 2019 yil 13 oktabr kuni Buxoro davlat universiteti va Italiyaning Piza universitetlari hamkorlikda “Buxoro ochiq matematika olimpiadasi” oʼtkaziladi. 2019 yil 30 sentabr kuni ushbu olimpiadani oʼtkazish toʼgʼrisida Oʼzbekiston Respublikasi Xalq taʼlimi vazirining 319-son buyrugʼi imzolandi.Olimpiadani oʼtkazishdan koʼzlangan asosiy maqsad iqtidorli yoshlarni aniqlash, ularning intellektual salohiyatini qoʼllab-quvvatlash, ragʼbatlantirish va matematik savodxonligini oshirish, jahon taʼlim sohasida yanada integratsiyalashuvi uchun qoʼshimcha shart-sharoitlar yaratish hamda oʼquvchilarga matematika fanidan oʼtkaziladigan xalqaro va Respublika olimpiadalari haqida batafsil maʼlumot berishdan iboratdir.Olimpiadani yuqori saviyada, xalqaro standartlarga mos ravishda oʼtkazish maqsadida hakamlar hayʼatiga Buxoro davlat universitetidan dunyoning oʼndan ortiq yetakchi oliy taʼlim muassasalarida malaka oshirib kelgan olim, Oliy taʼlim muassasalari talabalari oʼrtasida Аl-Xorazmiy nomli yosh matematiklarning Xalqaro olimpiadasi tashkiliy qoʼmitasi aʼzosi, BuxDU yosh olimpiadachi talabalar jamoasi ilmiy rahbari, Matematika kafedrasi mudiri, f.-m.f.n., dots. Rasulov Toʼlqin Husenovich, yosh olimpiadachi talabalar jamoasining ilmiy maslahatchilari Babayev Samandar va Dilmurodov Elyor hamda Matematika kafedrasi katta oʼqituvchisi Turdiev Halimlar jalb qilingan. Bundan tashqari Italiyaning Piza universiteti doktoranti Raximov Karim va Oʼzbekiston Respublikasi Xalq taʼlimi vazirligining fan olimpiadalari boʼyicha iqtidorli oʼquvchilar bilan ishlash departamentining yetakchi mutaxassisi Sardor Bazarbayevlar taklif qilingan.Olimpiada umumtaʼlim maktablarining 7-11 sinf oʼquvchilari, akademik litseylarning 1-2 bosqich oʼquvchilari va kasb-hunar kollejlarining 3-bosqich oʼquvchilari oʼrtasida oʼtkaziladi. Olimpiada topshiriqlari yozma ish shaklida boʼlib, unda 5 ta masala beriladi va har bir masala 7 ballik tizimda baholanadi. Ishtirokchilarga masalalarni yechish uchun 4 soat beriladi. Olimpiada uchun topshiriqlar (yozma ishlar) Buxoro davlat universiteti, Xalq taʼlimi vazirligining Fan olimpiadalari boʼyicha iqtidorli oʼquvchilar bilan ishlash departamenti va Italiyaning Piza universiteti mutaxassislari hamkorligida tuziladi. Ishtirokchilar orasidan “oʼziga xos yechim”, “eng yaxshi gʼoya” va boshqa nominatsiyalar boʼyicha gʼoliblar aniqlash rejalashtirilgan.
