Dunyoda shunday kasblar borki, muvaffaqiyatidan zahmati, rohatidan mehnati ziyoda. Shu kasblar qatorida ustoz va murabbiylik ham bor. Har birimiz ustoz-murabbiylarning zakiy ilmi, ta’lim-tarbiyasi, qalb qo‘ri, ko‘z nuri bilan bergan saboqlari tufayli unib-o‘samiz, jamiyatda o‘z o‘rnimizni egallaymiz.
Muhtaram Ustozlar!
Jamiyatning buguni va kelajagi, uning madaniy-ma’rifiy va ma’naviy salohiyati ta’lim tizimining qay darajada rivojlanganligi bilan belgilanadi. Ta’lim esa ustozlar mehnati, mashaqqatining mevasidir. Shu ma’noda xalqimiz hamisha ustozlarni ulug‘lab, zahmatli mehnatini qadrlab keladi.
Bugun biz yashayotgan zamon har daqiqada innovasion yangilik bilan yuzlashmoqda. Ayniqsa, ilm-fanda olamshumul bir qator yutuqlarga erishilmoqda. Ulkan fan olamida ilmiy maktab yarata olgan, intellektual salohiyatga ega bo‘lgan Buxoro davlat universiteti ham respublikada tayanch oliy ta’lim muassasasi hisoblanadi. Shu dargohda talabalarga ta’lim-tarbiya berib kelayotgan qadrdon jamoamni mamlakatimiz hayotidagi qutlug‘ sana — Ustoz va murabbiylar kuni bilan chin dildan muborakbod etaman.
Hurmatli kasbdoshlar!
Vatanimiz ravnaqi yo‘lida kelajagimiz poydevori bo‘lgan yoshlarimizni ilmli, barkamol inson qilib tarbiyalashdek yuksak, mas’uliyatli va mashaqqatli kasbga umr yo‘llaringizni baxshida etayotganingizni behad qadrlayman hamda Sizdek oliyjanob, ziyoli insonlar bilan faoliyat ko‘rsatayotganimdan mamnunman. Bugungi kunda universitetimizda erishilgan ulkan yutuqlarni e’tirof etishimiz maqsadga muvofiq deb o‘ylayman.
Jumladan,
-Oxirgi uch yilda ta’lim yo‘nalishlari soni 47 tadan 85 taga, magistratura mutaxassisliklari soni 26 tadan 42 taga, oliy ta’lim yo‘nalishlari va mutaxassisliklari klassifikatoridagi 10 ta ya’ni barcha bilim sohalari bo‘yicha kadrlar tayyorlashga erishildi. Universitetda barcha ta’lim shakllari (kunduzgi, sirtqi, kechki va masofaviy) bo‘yicha o‘quv jarayoni tashkil etildi. Jumladan, 2023/2024 o‘quv yilidan boshlab barcha kurs talabalari kredit-modul tizimida tahsil olishmoqda.
-Yangi avlod darslik va o‘quv adabiyotlarni yaratish 2019 yilda 90 ta bo‘lgan bo‘lsa, joriy yilning 9 oyi davomida 300 dan ortiq darslik va o‘quv adabiyotlar yaratishga erishildi.
-O‘quv jarayoniga ishlab chiqarishdan 100 ga yaqin amaliyotchi o‘qituvchilar hamda xorijdan 20 nafarga yaqin professor-o‘qituvchilar jalb etildi.
- Oliy ta’lim, fan va innovatsiyalar vazirligining www.unilibrary.uz platformasiga eng adabiyotlarni joylshatirgan OTM sifatida e’tirof etildi.
- Universitetda faoliyat olib borayotgan ilmiy darajali professor-o‘qituvchilar soni 390 taga yetib, ilmiy salohiyat 48,4% ni tashkil etmoqda.
- 2023 yilda universitetimizning xalqaro akademik reytinglardagi o‘rni yaxshilandi, bir qator maxsus reytinglarda yuqori 1000 talikdan o‘rin egallandi. Web of metrics reytingida 553-o‘rin, Round university rankings (Rossiya) ryeytingida 847-o‘rin egallandi. Buyuk Britaniyaning nufuzli reyting tashkiloti – Times Higher Education agentligining World University Rankings reytingining barqaror rivojlanishga qo‘shilgan hissa qismida 6 ta yo‘nalish bo‘yicha yuqori 800-1000 talikka kirildi, asosiy reytingda esa reportyor maqomiga ega bo‘ldik.
- 2023 yilning 9 oyi davomida xorijga malaka oshirish va stajirovkaga yuborilgan professor-o‘qituvchilar soni 38 nafarni tashkil etdi. Oktyabr-noyabr oylarida yana 70 nafar professor-o‘qituvchi yetakchi xorijiy hamkor universitetlarda malaka oshirish va stajirovkada bo‘lishadi.
Oliy ta’lim, fan va innovatsiyalar vazirining buyrug‘i bilan 1-oktyabr – O‘qituvchi va murabbiylar kuni munosabati bilan oliy ta’lim sohasida vijdonan faoliyat olib borib, yosh avlodning sifatli ta’lim olishida o‘zining fidokorona mehnati bilan namuna bo‘layotgan, tizim rivoji uchun o‘zining munosib hissasini qo‘shib kelayotgan universitetimizning bir guruh soha fidoyilari “Oliy ta’lim a’lochisi” ko‘krak nishoni bilan taqdirlandilar. Jumladan,
-Botanika va o‘simliklar fiziologiyasi kafedrasi professori Xolliyev Askar Ergashovich,
-O‘zbek tilshunosligi va jurnalistika kafedrasi professori Yuldasheva Dilorom Nigmatovna,
-Organik va fizkolloid kimyo kafedrasi professori Umarov Bako Bafayevich,
-BuxDU raqamli iqtisodiyot va inson resurslarini rivojlantirish IT markazi boshlig‘i Adizov Baxtiyor Ismatovich,
-Buxoro davlat universiteti Qatag‘on qurbonlari xotirasi muzeyi direktori Xamrayev Azalshoh Hazratovich
-Pedagogika kafedrasi mudiri Olimov Shirinboy Sharofovich
-Ingliz tilshunosligi kafedrasi dotsenti Raxmatova Mehriniso Musinovna
-BuxDU doktoranti Kasimova Ra’no Raxmatulloyevnalar “Oliy ta’lim a’lochisi” ko‘krak nishoni bilan taqdirlanishdi.
Prezidentimiz Shavkat Mirziyoyev ta’kidlaganlaridek, xalqimizning eng katta boyligini – millionlab farzandlar, jondan aziz o‘g‘il-qizlarimizning taqdirini, O‘zbekiston istiqbolini sizlarga ishonib topshirganmiz. Va bu vazifani mas’uliyat bilan ado etib kelayotgan sizlar kabi fidoyi insonlar, kelajak bunyodkorlariga har qancha tahsin va tasannolar aytsak, arziydi. Shu ishonchga har birimiz munosib bo‘lib, bebaho O‘zbekistonimizda ilm-fanni yuksaltirish va jahon hamjamiyatidagi o‘rni hamda nufuzi har doim ortib borishiga o‘z mehnatimiz bilan hissa qo‘shish barchamizga nasib etsin.
Fidoyiligingiz va zahmatli mehnatingiz bilan jamoamiz ishini yanada yuksak marralarga olib chiqishda g‘ayrat va shijoat, oilaviy baxt, tinchlik, xotirjamlik, keng yurak, doimiy ilmiy izlanishda muvaffaqiyat tilayman.
Dillarimizdagi eng yaxshi tilaklarimiz sizga bo‘lsin. Ta’lim-tarbiya yo‘llarida hormang-tolmang. Ushbu savobli ishlaringizda Alloh doimo madadkor bo‘lsin. Doimo farzandlaringiz, shogirdlaringiz, el-u yurtimiz hurmati va ardog‘ida bo‘lish baxti nasib esin, aziz ustozlar!
Obidjon Xamidov
BuxDU rektori, iqtisod fanlari doktori, professor
