Oliy ta’lim, fan va innovatsiyalar vazirligi huzuridagi Innovatsion rivojlanish agentligining Ilm-fan va ta’lim integratsiyasi boshqarmasi boshlig‘i Qodirova Fazilat Shukurovna Buxoro davlat universitetining ilmiy faoliyati bilan tanishdi.
Tashrif davomida universitet professor-o’qituvchilar va iqtidorli talabalar tomonidan qo’lga kiritilgan loyihalarning bajarilish holati, mavjud ilmiy laboratoriyalardan samarali foydalanish holati, axborot resurs markazida doktorant va tadqiqotchi olimlar uchun yaratilgan shart-sharoitlar bilan tanishildi. Agronomiya va biotexnologiya fakulteti tadqiqotchi olimlari tomonidan agrar sohani rivojlantirishga va Buxoro viloyati hududi muammolaridan kelib chiqqan holda bajarilayotgan doktorlik dissertatsiyalari natijalari taqdimotida ishtirok etildi.
Qodirova Fazilat Shukurovna universitetning katta yig'ingohida tayanch doktorant (PhD), doktorant (DSc), mustaqil izlanuvchilar hamda yosh tadqiqotchi olimlar bilan ochiq muloqot o’tkazib, unda mahalliy va xalqaro loyihalar, stajirovkalar va til sertifikatlari bo’yicha batafsil ma’lumotlar berdi. Tadbir so’ngida ishtirokchilar o’zlarini qiziqtirgan savollar bilan murojaat qilib, bahs-munozaralarda faol ishtirok etdilar.
