Buxoro davlat universitetida "Shuhrat" medali sohibi, Buxoro shahri "Yagona Buxoro" mas'uliyati cheklangan jamiyati rahbari Sherov Jo'ramurod Safarovich bilan uchrashuv bo'lib o'tdi.
Buxoroning tanti, saxovatpesha tadbirkori uchrashuv mobaynida bu sohaga qanday kirib kelgani, mashaqqatli va ibratli hayot yo'li xususida talaba-yoshlarga so'zlab berdi. Bugungi kecha-kunduzda tadbirkorlar uchun yaratilgan shart-sharoitlar xususida o'z mulohazalarini o'rtoqlashar ekan: "Inson, avvalo, maqsadini belgilab olishi zarur. So'ng shu reja asosida o'zi qiziqqan, sevgan sohaning ichida "yashashi", birgalikda nafas ola bilishi kerak. Shundagina natijaga erishiladi. Ushbu muvaffaqiyatning, kunlarning shukronasi o'laroq mehr va saxovatni kanda qilmasa, tadbirkorlikda barakaga erishadi," - dedi tadbirkor talaba-yoshlarga yuzlanib.
Uchrashuvda Buxoro shahridagi 32-son Mehribonlik uyida tarbiyalangan, ayni chog'da tadbirkorga shogird bo'lgan Pyotr ham ishtirok etdi. Pyotr ham hayot yo'li, o'z qiziqishlari va tadbirkorlik borasida olib borayotgan ishlarini talabalarga o'rtoqlashdi. Hayotsevarlik, mehnat va harakat orqali yuksak natijalarga erishilishini hayoti misolida so'zlab berdi. Uchrashuv ochiq muloqot tarzida, savol-javoblar asnosida davom etdi.
