Universitet huzuridagi “My office” kovorking markazida AQShlik tadbirkor, bir necha venchur kompaniyalar egasi, investor Bill Gillies ishtirokida seminar-trening bo‘lib o‘tdi. Seminar-treningda Bill Gillies talabalar uchun tadbirkorlik ko‘nikmalarini shakllantirish, o‘z loyihalariga xalqaro venchur fondlarini jalb qilish mavzusida ma’ruza qildi. Seminar-treningda kelajakda iqtisodchi kadrlar uchun qo‘yiladigan talablar, kerakli bilimlar xususida ham so‘z bordi. Bill Gillies kelajakda katta hajmdagi ma’lumotlar bazasi bilan ishlaydigan kadrlarga talab ortishini ta’kidladi. Bu jarayonda albatta rivojlanish bosqichidagi sun’iy intellektga asoslangan texnologiyalar o‘z ta’sirini o‘tkazishi muhokama qilindi. Investitsiya loyihalari, ularning jozibadorligini aniqlash, qanday turdagi loyhalarga investitsiya kiritish va bu jarayonlarda qaysi omillarni inobatga olish mavzusida ham qiziqarli fikrlar bayon qilindi.
Shuningdek, mehmon universitet huzuridagi “Business accelerator”da faoliyat olib borayotgan, universitet ta’sischiligidagi “I-Innoturizm” akademik tijorat korxonasining ACCA xalqaro buxgalteriya kurslari tinglovchilari bilan ham uchrashdi. Bugungi kunda butun dunyodagi, xususan dunyoning eng rivojlangan iqtisodiyoti hisoblangan AQShda buxgalterlik kasbining istiqbollari xususida qisqa muhokama bo‘lib o‘tdi. Tinglovchilarga o‘z profillari bo‘yicha eng yetuk kadr bo‘lishlari, katta hajmdagi ma’lumotlar orasidan kerakli ma’lumotlar tanlash va tahlil qila olish qoiliyati ega bo‘lishlari, bu sohalarda o‘z bilimlarini muntazam ravishda oshirib borishlari lozimligi ta’kidlandi.
