2016 yil 15 dekabr kuni Buxoro davlat universitetida Buxoro viloyati hokimligi,O’zbekiston Yozuvchilar uyushmasi Buxoro viloyati bo’limi,Matbuot va axborot agentligi viloyat hududiy boshqarmasi,Buxoro davlat universiteti,“Buxoronoma” va “Buxarskiy vestnik” gazetalari tahririyatibilan hamkorlikdataniqli shoir va tarjimon, tasavvufshunos olim, O’zbekiston Yozuvchilar uyushmasi a’zosi Sadriddin Salim Buxoriy tavalludining 70 yilligi munosabati bilan “Sharif shahar shoiri” deb nomlangan xotira kechasi o’tkazildi. Sadriddin Salim Buxoriy Buxoro va Buxoro tarixi, buyuk olimu fuzalolari hayoti va ma’naviy merosiga bag’ishlangan kitob, risola va maqolalari orqali el nazariga tushgan taniqli tarixshunos, tasavvufshunos olim hamda otashin publisist hamdir. Uning “Dilda yor”, “Bahouddin Naqshband yoki etti pir”, “Dahmai Behishtiyon”, “Mavlono Orif Deggaroniy”, “Buyuk G’ijduvoniylar”, “Hazrat Abu Hafs Kabir” va boshqa tarixiy-ma’rifiy kitoblari kitobxonlarga ma’lum. Olim, ayniqsa, “Ikki yuz etmish etti pir” kitobi orqali o’zining qomusiy bilim sohibi ekanligini namoyon etdi. Unda besh yuzdan ortiq allomalar haqida qimmatli ma’lumotlar berilgan. U besh qismdan iborat “Imom al-Buxoriy” televideofilmi, “Abu Hafs Kabir”, “Xojai Jahon” telefilmlari ssenariysi muallifidir.Adib “Mehnat shuhrati”, “Fidokorona xizmatlari uchun” ordenlari bilan mukofotlangan.Adabiy-ma’rifiy anjumanda ibratli inson, salohiyatli olim, Gyotening salohiyatli tarjimoni Sadriddin Salim Buxoriy lirikasining o’ziga xos fazilatlari haqida A.Saidov, G’.Murodov; shoirning hamkasb do’stlari, shogird va yaqinlari – S.Azimov, G’.Hojiev, A.Jo’rayev, Vafo Fayzullo, M.Salimova, hamda Buxoro davlat universiteti rektori, professor A.To’laganovning ma’ruzalari tinglandi.
