Qadrli buxgalterlar!
Bugun Xalqaro miqyosda nishonlanayotgan kun – kasb bayramingiz bilan samimiy qutlayman. Ayni shu kuni, yaʼni 10-noyabr dunyoda Xalqaro buxgalteriya kuni (International Accounting Day) etib belgilangani, hatto mazkur sana ko`pgina mamlakatlarda milliy bayramga aylanib ulgurgani bejiz emas. Butun dunyoda bir xil qiymatli, mashaqqatli va qadrli kasbga ega bo`lgan, ijtimoiy va iqtisodiy hayotimizda muhim insonlar, aziz buxgalterlar!
Buxgalteriya hisobi tizimini yo‘lga qo‘ymasdan turib, korxonalarning rivojlanishi va raqobatlashishi mumkin emas. Buxgalteriya hisobi iqtisodiyotni kuchaytirish uchun eng muhim vositadir. Ushbu kasb globallashuv jarayonida iqtisodiy, ijtimoiy, moliyaviy va axborot texnologiyalari sohalaridagi o‘zgarishlar bilan ahamiyat kasb eta boshladi va o‘zining huquqiy o‘ziga xosligi bilan jamiyat va tadbirkorlik hayotida samarali darajaga ko‘tarildi. Bugungi kunda hech bir korxona yoki tashkilot, tajribali va jiddiy buxgalter xodimlarining sifatli ishlashisiz samarali tarzda rivojlana olmaydi.
Raqamlar bilan ishlaydigan kishi sifatida sizga yilning 365 kunida ham kayfiyat, matonat, shijoat tilayman. Barcha sohalarda shiddat bilan rivojlanayotgan O`zbekistonimizning keyingi taraqqiyotida ham sizning hissangiz katta. Oldimizda turgan ulkan vazifalarning muvaffaqiyati kasbiga fidoyi buxgalterlarimizning halolligi, shijoati va sadoqatiga bevosita bog`liq.
Azizlar! Sizni va kasbingizda ko`makchi bo`lgan oila a’zolaringizni bayram bilan tabriklab, sog‘lik, baxt va muvaffaqiyatlar tilayman.
Bayramingiz muborak bo`lsin!
Xamidov Obidjon Xafizovich,
Iqtisod fanlari doktori, professor
