Dunyo tarixida juda katta nom qoldira olgan buyuk sarkarda, O‘rta asrlarning eng mashhur afsonaviy qo‘mondoni, ulkan imperiya asoschisi, Temuriylar sulolasining bosh bo‘g‘ini, kuchli strateg va siyosatchi, yengilmas inson – Amir Temur tavalludiga 686 yil to`ldi.
Buxoro davlat universiteti katta faollar yig`ingohida Tarix va madaniy meros fakulteti tashabbusi bilan Amir Temur tavalludiga bag`ishlangan “Sohibqiron Amir Temur – shon-shuhratimizning buyuk timsoli” mavzusida katta tantana bo`lib o`tdi.Tadbirni Tarix va madaniy meros fakulteti dekani Jamshid Jo`rayev “Amir Temur adolatli hukmdor va yuksak ma’naviyat egasi” nomli ma’ruzasi bilan ochib berdi.
“Sohibqiron Amir Temur tavalludi arafasida bu buyuk sarkarda ehtiromini joyiga qo`yish niyatida anjuman tashkil etilishi quvonarli hol. Amir Temur siymosi dunyo miqyosida o`rganilayotgan ekan, O`zbekistonda uning nomiga atab ochilgan “Temurbeklar maktabi” kabi harbiy-litseylar faoliyat yuritayotgan ekan, Xalqaro ilmiy anjumanlar uyushtirilayotgan ekan, bunday tadbirlar ana shu yo`lda amalga oshirilayotgan ijobiy ishlardan biridir. Jahongirning har birimizning qalbimizda vatanparvarlik ruhini tarbiyalashda ahamiyati beqiyos, shuning uchun biz Amir Temur faoliyatiga har qadamda murojaat etamiz, uning bunyodkorlik ishlari, adolatparvarligi, saxovatpeshaligi biz uchun namuna hisoblanadi”, – dedi tadbirda so`zga chiqqan Buxoro davlat universiteti professori, tarix fanlari doktori Sulaymon Inoyatov samimiy dil so`zlarini bildirib.
Tadbir davomida ustozlardan ma’ruzalar tinglandi. Amir Temur siymosi talabalar tomonidan jonlantirilishi barobarida “Temur tuzuklari”dan namunalar aytildi. Ayniqsa, Amir Temur va Sulton Boyazid o`rtasidagi Anqara jangidan oldin farzandlari bilan suhbati ko`rsatilgan sahna ko`rinishi yig`ilganlarga chuqur taassurot qoldirdi. Amir Temur nafaqat buyuk sarkarda balki yetuk shaxs ekanligi mahorat bilan ko`rsatildi. Siyosat bobida beqiyos Amir Temurning g`alabadan so`ng elchilarni qabul qilish sahnasi o`sha davr haqida yetarli taassurot uyg`otdi. Milliy gvardiya xodimlarining mardona chiqishlari, kuy-qo`shiqlar yig`ilganlarga ko`tarinki ruh bag`ishladi.
