2021-yil 2-noyabr sanasida Buxoro davlat universiteti katta majlislar zalida Oliy ta’limdan keyingi ta’lim institutining 2022-yil qabuli uchun tayanch doktorantura (PhD), doktorantura (DSc) hamda maqsadli tayanch doktorantura (PhD) ga mutaxassislik va chet (ingliz, fransuz, nemis) tili fanlaridan imtihon jarayoniga jalb etilgan qabul komissiyasi a’zolari bilan yig’ilish o’tkazildi. Yig’ilishni universitet rektori, i.f.d., professorO.X. Xamidov ochib berdi hamda Oʼzbekiston Respublikasi Prezidentining 2017-yil 16-fevraldagi “Oliy oʼquv yurtidan keyingi taʼlim tizimini yanada takomillashtirish toʼgʼrisida”gi PF-4454 sonli Farmoyishi, Oʼzbekiston Respublikasi Vazirlar Mahkamasining 2017-yil 22-maydagi “Oliy oʼquv yurtidan keyingi taʼlim tizimini yanada takomillashtirish chora-tadbirlari toʼgʼrisida”gi 304-sonli Qarori hamda “Oliy oʼquv yurtidan keyingi taʼlim toʼgʼrisidagi’ Nizom talablariga qat’iy amal qilgan holda kirish imtihonlarini tashkil etish lozimligini ta’kidladi. Shuningdek, har bir ixtisoslik boʼyicha tuzilgan Dastur asosida imtihon savollarini nazariy va amaliy jihatdan puxta tayyorlash hamda savollar sifati boʼyicha har qanday eʼtirozlarga oʼrin qoldirmaslik, kirish imtihonlari va suhbat jarayonlarini videokuzatuv ostida onlayn translyatsiyasini tashkil etgan holda oʼtkazish bo’yicha yig’ilish qatnashchilariga ko’rsatmalar berildi. Shundan so’ng, Ilmiy ishlar va innovatsiyalar bo’yicha prorektor, i.f.d. (DSc), dotsent O.S. Qahhorov so’zga chiqib, Oliy ta’limdan keyingi ta’lim institutining ahamiyati hamda tanlov asosida qabul qilinadigan kadrlar universitet ilmiy salohiyatini oshirishga xizmat qilishini ta’kidlab, imtihon jarayonlarini shaffofligini ta’minlash va korrupsiyani oldini olish to’g’risida komissiya a’zolariga hamda mas’ullarga tegishli topshiriq va ko’rsatmalarni berdi.BuxDU Matbuot xizmati
